Tags-Khwab

chamakte ḳhvāb milte haiñ mahakte pyaar milte haiñ
tumhāre shahr meñ kitne hasīñ āzār milte haiñ

ḳhvāb kā rishta haqīqat se na joḌā jaa.e
ā.īna hai ise patthar se na toḌā jaa.e

tujh ko bhī jab apnī qasmeñ apne va.ade yaad nahīñ
ham bhī apne ḳhvāb tirī āñkhoñ meñ rakh kar bhuul ga.e

āñkhoñ meñ jo bhar loge to kāñToñ se chubheñge
ye ḳhvāb to palkoñ pe sajāne ke liye haiñ

sachche haiñ apne va.ade ke aate vo ḳhvāb meñ
'nāzim' mujhī ko niiñd na aa.ī tamām raat

shikasta ḳhvāb ke malbe meñ DhūñDhtā kyā hai
khañDar khañDar hai yahāñ dhuul ke sivā kyā hai

kuchh ḳhvāb kuchh gulāb the chehre ke ās-pās
dekhā tujhe to hausla dil ko baḌā huā

ye shīsha-ghar abhī tak arsa-e-takmīl meñ hai
ye ḳhvāb-e-ḳhūbsūrat mo.ariz-e-ījād meñ hai

do ghaḌī ko hī haqīqat ye bhulāne ke liye
ḳhvāb dekhe koī kaise ki haiñ āñkheñ qaidī

baġhair samt huā huuñ maiñ dar-ba-dar kaisā
mujhe bhī ḳhvāb dikhā.ī diyā magar kaisā

hamāre jāgne tak dekhnā tum
hamāre ḳhvāb kā charchā rahegā

ab ḳhvāb hī meñ un se mulāqāt ho to ho
milne kī un kī aur to sūrat nahīñ rahī

bas ek ḳhvāb kī sūrat kahīñ hai ghar merā
makāñ ke hote hue lā-makāñ ke hote hue

hameñ yūñhī na sar-e-āb-o-gil banāyā jaa.e
hamāre ḳhvāb diye jaa.eñ dil banāyā jaa.e

tapish se phir naġhma-e-junūñ kī surūd-o-chañg-o-rabāb TuuTe
kisī haqīqat ke ek sañg-e-girāñ se Takrā ke ḳhvāb TuuTe

sunā rahī haiñ vafā kī rāheñ shikast-e-parvāz kā fasāna
ki duur tak vādī-e-talab meñ paḌe haiñ har samt ḳhvāb TuuTe

āmad-e-gul kā vīrānī bhī dekh rahī hai kyā kyā ḳhvāb
vīrānī ke ḳhvāb ko aao vahshat se ta.abīr kareñ

āñkhoñ pe mujh ko apnī bharosa nahīñ rahā
itnā ḳharāb ḳhvāb kā anjām kyuuñ huā

din ko to bīm-e-fitna hai ham us se mil sakte nahīñ
aatā hai jis dam ḳhvāb meñ jab dekhte haiñ be-ḳhalal

rañg hai raushnī hai mūrat hai
tū mire ḳhvāb kī haqīqat hai