Tags-Khwab

ye din Dhale kis kā muntazir maiñ nayā nayā sā
ye phailte ḳhvāb mere andar na.e na.e se

ta.abīr mile yā na mile baat alag hai
āñkhoñ se magar ḳhvāb churāyā nahīñ jaatā

tavāf kar ke thakan se jo chuur chuur hue
hameñ dikhā.ī diyā but kā ḳhvāb ka.abe meñ

dhuup ho chāñdnī ho bārish ho
ek chehra ki ḳhvāb jaisā hai

zindagī bahut masrūf ho ga.ī hai
jo ḳhvāb mujhe aaj dekhnā thā

thā nigāhoñ meñ basāyā jaane kis tasvīr ko
dekh kar hairān haiñ ab ḳhvāb kī ta.abīr ko

apne mar-miTne ke asbāb bahut dekhtā huuñ
ishq vaalā huuñ tire ḳhvāb bahut dekhtā huuñ

arsa-e-dahr to hai merī nigāhoñ kā tilism
jab bhī maiñ dekhtā huuñ ḳhvāb bahut dekhtā huuñ

safar hai dushvār ḳhvāb kab tak bahut paḌī manzil-e-adam hai
'nasīm' jaago kamar ko bāñdho uThāo bistar ki raat kam hai

jitne ḳhvāb utnī ta.abīreñ
kitne daaġh shumār karoge

vāmānda-e-vaqt aañkh ko manzar na dikhā aur
zimme hai hamāre abhī ik ḳhvāb kī tashkīl

ḳhvāb āñkhoñ ko hamārī jo dikhā.e aa.ina
ḳhuun ke aañsū vahī ham ko rulā.e aa.ina

aa.ine ke sāmne se koī to haTtā nahīñ
aur kisī ko ḳhvāb tak ye Darā.e aa.ina

lagtā hai vo aaj ḳhvāb jaisā
ik shaḳhs khulī kitāb jaisā

roz vo ḳhvāb meñ aate haiñ gale milne ko
maiñ jo sotā huuñ to jaag uThtī hai qismat merī

ik ḳhvāb ko āñkheñ rehn rakheñ ik shauq meñ dil vīrān kiyā
jiine kī tamannā meñ ham ne marne kā sabhī sāmān kiyā

ḳhvāb TuuTā to gir paḌe taare
aañkh malne ke ba.ad kyā hogā

ham paḌh rahe the ḳhvāb ke purzoñ ko joḌ ke
āñdhī ne ye tilism bhī rakh Daalā toḌ ke

kuchh bhī nahīñ jo ḳhvāb kī sūrat dikhā.ī de
koī nahīñ jo ham ko jagā.e jhiñjhoḌ ke

maiñ aksar sochtī thī ye akelā ghar kabhī ābād bhī hogā
maiñ us an-dekhe mehmāñ kī pazīrā.ī meñ kyā kyā ḳhvāb bhejūñgī