Tags-Khwab

hamāre ḳhvāb meñ saa.e ka.ī the
kisī ke dosh par chehra nahīñ thā

tañg-dastī meñ karo logo guzārā dekh kar
apnī nīndeñ mat uḌaao ḳhvāb mahñgā dekh kar

umr bhar kī bandisheñ ḳhvāb-o-ḳhayāl
do qadam bhī saath hai chalnā bahut

jo shab ko manzar-e-shab taab meñ tabdīl karte haiñ
vo lamhe niind ko bhī ḳhvāb meñ tabdīl karte haiñ

jaane kab hogā mirī zaat pe āp-apnā nuzūl
ḳhvāb koī to kabhī merī bashārat mujhe de

lazzat-e-ḳhvāb de ga.e husn-e-ḳhayāl de ga.e
ek jhalak meñ itnā kuchh ahl-e-jamāl de ga.e

vo paas aane na paa.e ki aa.ī maut kī niiñd
nasīb so ga.e masrūf-e-ḳhvāb kar ke mujhe

aao palkoñ se chuneñ bikhre hue lamhāt ko
niiñd aa jaa.e na jab tak ḳhvāb kī bāteñ karo

mirī aarzū koī ḳhvāb thā so maiñ rat-jagoñ se ulajh paḌā
mirī āfiyat thī ḳhumār meñ mujhe jāgne meñ hunar rahā

ye jo zindagī kī kitāb hai ye kitāb bhī kyā kitāb hai
kahīñ ik hasīn sā ḳhvāb hai kahīñ jān-levā azaab hai

ārzūoñ ke bahut ḳhvāb to dekho ho 'vasīm'
jaane kis haal meñ be-dard zamāna rakkhe

maiñ zīna-e-ḳhvāb se utar kar sahar talak aa to jā.ūñ lekin
ye shaam mujh par ayaañ na hogī ye shab mujhe rāsta na degī

āñdhiyāñ aa.iiñ to sab logoñ ko ma.alūm huā
parcham-e-ḳhvāb zamāne meñ nigūñ kitnā hai

sub.h kī shabnamī palkoñ ko masalte hue haath
ik na.e ḳhvāb kī koñpal se bañdhe rahte haiñ

zindagī sone kī mohlat nahīñ detī hai 'diyā'
ḳhvāb ta.abīr ke āñchal se bañdhe rahte haiñ

duur āfāq pe lahrā.ī koī nuur kī lahr
ḳhvāb hī ḳhvāb meñ bedār huā dard kā shahr

na ham the na hañgāma-e-kā.enāt
khulī aañkh aur ḳhvāb sā ho gayā

vo kapkapāte hue hoñT mere shāne par
vo ḳhvāb saañp kī mānind Das gayā mujh ko

'nasīr' shor na kar fitna hovegā barpā
ḳhudā-na-ḳhvāsta ab gar vo mast-e-ḳhvāb uThā