Tags-Khwab

chāñd kā patthar bāñdh ke tan se utrī manzar-e-ḳhvāb meñ chup
chiḌiyāñ duur sidhār ga.iiñ aur Duub ga.ī tālāb meñ chup

un se honī haiñ ḳhvāb meñ bāteñ
merā sonā bahut zarūrī hai

'diyā' ye aañkh to ik ḳhvāb se hī bhar aa.ī
tumhāre naam pe ham zindagānī kyā karte

adhūre sher se kuchh ḳhvāb apne
hameñ nīñdoñ se bhaTkāne bhī nikle

phir pusht pe har ḳhvāb kī zanjīr-zanī ho
jab shām-e-ġharībāñ mirī poshāk pe rakkho

mujhe is ḳhvāb ne ik arse tak be-tāb rakkhā hai
ik ūñchī chhat hai aur chhat par koī mahtāb rakkhā hai

bār-hā tū ne ḳhvāb dikhlā.e
bār-hā ham ne kar liyā hai yaqīñ

apnī masarratoñ ke na.e baab DhūñDne
āñkheñ nikal paḌī haiñ na.e ḳhvāb DhūñDne

phuul khilne ko to naqqāsh khile ḳhvāb magar
mere zaḳhmoñ ke chaTaḳhne kī sadā ho goyā

vo ba.ad-e-muddat milā to rone kī aarzū meñ
nikal ke āñkhoñ se gir paḌe chand ḳhvāb aage

hotī hai niiñd meñ kahīñ tashkīl-e-ḳhadd-o-ḳhāl
uThtā huuñ apne ḳhvāb kā chehra uThā ke maiñ

abhī to āñkhoñ meñ nā-dīda ḳhvāb baaqī haiñ
jo vaqt likh nahīñ paayā vo baab baaqī haiñ

Dartā huuñ zindagī ke vasīle nahīñ mile
ā.ankhoñ ko ab ke ḳhvāb rañgīle nahīñ mile

ḳhat meñ likkhā huā aa.egā judā.ī kā payām
ḳhvāb meñ ḳhat ke hue harf judā aap hī aap

sarāb dekhtā huuñ maiñ ki aab dekhtā huuñ maiñ
samajh meñ jo na aa sake vo ḳhvāb dekhtā huuñ maiñ

vo hoshiyār aadmī ki jāgtā hai raat din
kabhī kabhī use bhī mast-e-ḳhvāb dekhtā huuñ maiñ

vahm sābit hue sab ḳhvāb suhāne tere
yaad karte haiñ magar log fasāne tere

haqīqatoñ se kaho hoshiyār ho jaa.eñ
maiñ apne ḳhvāb ko mīzān karne vaalā huuñ

kal raat muñd ga.ī thiiñ bahutoñ kī āñkheñ ġhash se
dekhā kiyā na kar to sarmast ḳhvāb ho kar

guzishta saal rahā jin pe tañg arsa-e-vaqt
vo saare ḳhvāb ba-ta.abīr ab ke saal meñ haiñ