Tags-Khwab

āḳhirī dhuup haiñ āñkhoñ meñ basā lo varna
phir kahāñ ḳhvāb kisī shab kā suhānā hogā

ḳhūb-sūrat haiñ ye āñkheñ lekin kyā maiñ āñkhoñ meñ Thahar jā.ūñgā
ḳhvāb kī tarah se dekhā hai tumheñ ḳhvāb kī tarah bikhar jā.ūñgā

sab ḳhvāb purāne haiñ har chand fasāne haiñ
ham roz basāte haiñ āñkhoñ meñ na.ī duniyā

ham ko payambarī kī bashārat nahīñ milī
ilhām kā vo ḳhvāb farishte se kho gayā

dekhā to ḳhalvat-e-ḳhas-o-ḳhāshāk ḳhvāb meñ
raushan koī charāġh-e-sharār intizār thā

āḳhirash rishta nā qaa.em ho sakā
ḳhvāb jo dekhe kahānī ho ga.e

tumhārī āñkhoñ ke sāmne hī hamārī āñkhoñ kā ḳhvāb TuuTe
fazā kī rañgīn titliyoñ kī nazar se shāḳh-e-gulāb TuuTe

jal thal kā ḳhvāb thā ki kināre Dubo gayā
tanhā kañval bhī jhiil se bāhar nikal paḌā

hai dīda-e-be-ḳhvāb mirā kitnā farebī
jab dekhiye lagtā hai kisī ḳhvāb meñ Duubā

kho diyā tūl-e-shab-e-furqat ne lutf-e-intizār
dīda-e-be-ḳhvāb ko hai hasrat-e-dīdār-e-sub.h

haqīqatoñ ko fasāna nahīñ banātī maiñ
tumhāre ḳhvāb se ḳhud ko nahīñ jagātī maiñ

ik masāfat paañv shal kartī huī sī ḳhvāb meñ
ik safar gahrā musalsal zardī-e-mahtāb meñ

raheñge ban ke kasak sī dil meñ
jo jaagī āñkhoñ ke ḳhvāb hoñge

niiñd mukammal karte karte
ḳhvāb adhūrā rah jaatā hai

gahre samundaroñ meñ utarne kī le ke aas
baiThe hue hai ek kināre hamāre ḳhvāb

dhund meñ kho ke rah ga.iiñ sūrateñ mehr-o-māh sī
vaqt kī gard ne unheñ ḳhvāb-o-ḳhayāl kar diyā

hisār-e-ḳhvāb se bāhar kabhī nikal na sakūñ
bichhā ke raah meñ palkoñ kā jaal rakkhā thā

kisī kā aks mujhe ḳhvāb meñ dikhā thā kabhī
tamām umr rahe mere rat-jage raushan

roz karte haiñ shab-e-hijr ko bedārī meñ
apnī āñkhoñ meñ subuk ḳhvāb-e-girāñ hai ki jo thā

garāñ hai tab-e-zamāna pe har sadā-e-nafas
ḳhayāl-o-ḳhvāb pe nuqtoñ kā pairahan kyuuñ hai