Tags-Khwab

nahīñ hai 'shāhīn' ḳhvāb par e'tibār mujh ko
so zindagī kī haqīqatoñ meñ tumheñ milūñgī

ab ye udaas din hameñ saath liye liye phire
ḳhvāb bujhe to kyā rahā kaalī ghaTā bhī kyuuñ khule

saarī bāteñ ḳhvāb kī ta.abīr se miltī to haiñ
merī tahrīreñ tirī tasvīr se miltī to haiñ

saare māhaul ko de duuñ kisī tābīr kā vajd
apnī mastī meñ koī ḳhvāb sunā.ūñ maiñ bhī

din ulaT detā hai har ḳhvāb kī ta.abīr magar
raat dikhlātī hai phir koī nayā ḳhvāb hameñ

ye kaisī aañkh thī jo ro paḌī hai
ye kaisā ḳhvāb thā jo bujh gayā hai

ḳhvāb jaisī kahīñ kahīñ shāyad
zindagī hai magar nahīñ shāyad

yā itnī na tabdīl huī hotī ye duniyā
yā maiñ ne ise ḳhvāb meñ dekhā nahīñ hotā

tū jis ke ḳhvāb meñ aayā ho vaqt-e-sub.h sanam
namāz-e-sub.h ko kis tarah vo qazā na kare

merī āñkhoñ meñ aa ke bas jaao
ek rañgīn ḳhvāb kī sūrat

band muTThī meñ mirī raakh thī tābīroñ kī
us kī āñkhoñ meñ bhī ik ḳhvāb marīzāna thā

arsa-e-rafta pe nazreñ paḌ rahī haiñ vahm kī
ḳhvāb kī tasvīr hai yā zindagī kī shaam hai

gulzār-e-jahāñ meñ gul kī tarah go shaad haiñ ham shādāb haiñ ham
kahtī hai ye hañs kar sub.h-e-ḳhizāñ sab nāz-e-abas ik ḳhvāb haiñ ham

kis māh-e-laqā ke ishq meñ yuuñ bechain haiñ ham betāb haiñ ham
kirnoñ kī tarah āvāra haiñ ham tāroñ kī tarah be-ḳhvāb haiñ ham

miT jaane pe bhī masrūr haiñ ham murjhāne pe bhī shādāb haiñ ham
shahbā-e-shabāb-o-ishq kā ik bhūlā huā rañgīñ ḳhvāb haiñ ham

ḳhabar hai ḳhvāb TūTegā yaqīnan
magar ik fāḳhta dukh sah rahī hai

intihā kar leñ sitam kī log abhī haiñ ḳhvāb meñ
jaag uTThe jab log to un ko Thaharnā hī nahīñ

bedārī ke bistar par maiñ un ke ḳhvāb sajātā huuñ
niiñd bhī jin kī TaaT ke uupar ḳhvāboñ se nādār girī

tere mere ḳhvāb judā
ḳhvāboñ ke asbāb judā

tere va.ade terī yādeñ tere naġhme tere ḳhvāb
husn se bharpūr daulat mere kāshāne meñ hai