Tags-Khwab

ḳhvāb-e-adam se maiñ abhī chauñkā huuñ duur ho
ai sub.h-e-ġham na apnā mujhe muñh dikhā sarak

mirī band aañkh pe vā hue ka.ī dar tilism-e-ḳhayāl ke
mujhe niiñd aa.e to kis tarah mujhe ḳhvāb-e-ahd-fazā milā

kitnī sadiyoñ se zehn-e-insāñ meñ
rañg-o-nik.hat ke ḳhvāb palte haiñ

roz ye ḳhvāb Darātā hai mujhe
koī saaya liye jaatā hai mujhe

thī jiitī jāgtī duniyā mirī mohabbat kī
na ḳhvāb kā sā vo aalam ki lā-shu.ūrī thā

ḳhvāb-o-fusūñ nahīñ to kyā dil ye junūñ nahīñ to kyā
ḳhalvat-e-dost aur tū terā kahāñ ḳhayāl hai

maiñ ne dekhā thā kabhī sāyoñ ke Takrāv kā ḳhvāb
aaj us ḳhvāb kī ta.abīr mujhe miltī hai

nahīñ hai is niiñd ke nagar meñ abhī kisī ko dimāġh merā
magar kisī ḳhvāb ke safar meñ sipar kareñge charāġh merā

kin guzargāhoñ ke haiñ gard-o-ġhubār āñkhoñ meñ
roz patjhaḌ ke hameñ ḳhvāb dikhātī hai havā

larazte haiñ mirī mahrūm-e-ḳhvāb āñkhoñ meñ
bikhar chuke haiñ jo ḳhvāb un ke muntashir partav

kyā jaane kaise ḳhvāb sajāne paḌeñ ai 'shauq'
āñkho meñ ik hasīn sā manzar bhī le chalo

maiñ apnī niiñd agar TūTne nahīñ detā
us ek ḳhvāb se har vaqt TūTnā thā mujhe

vo kaash vaqt ke pahre ko toḌ kar aate
jo mahv-e-ḳhvāb haiñ un ko jhiñjhoḌ kar aate

kuchh nuqūsh aise bhī haiñ jo nahīñ miTte dil se
zindagī ishq kī ik ḳhvāb-e-farāmosh sahī

sab baḌe zo.am se aa.e the na.e sūrat-gar
sab ke dāman se vahī ḳhvāb purāne nikle

ḳhvāb tumhāre aate haiñ
niiñd uḌā le jaate haiñ

kyā kyā maze se raat kī ahd-e-shabāb meñ
chhoḌūñ na umr-e-rafta gar aa jaa.e ḳhvāb meñ

āshiqī meñ 'mīr' jaise ḳhvāb mat dekhā karo
bāvle ho jāoge mahtāb mat dekhā karo

kivāḌ khulte hoñ jaise kisī ḳhazāne ke
vo ḳhvāb ḳhvāb sī āñkhoñ kā baaz ho jaanā

kaun āḳhir jhiñjhoḌtā hai mujhe
ālam-e-ḳhvāb meñ sar-e-bistar