Tags-Khwab

ḳhatm huā har ḳhvāb-e-tamāshā raakh huā har shahr-e-sadā
dasht hai har sū tanhā.ī kā hue haiñ ham bedār kahāñ

ai bahār-e-abr-e-nau jaldī baras
jal rahe haiñ ḳhvāb añgāroñ ke biich

ḳhvāb kī daulat chain se sone vāloñ kī
taare ginnā kaam hai ham bedāroñ kā

ye daur-e-mai-kashī har-vaqt mahv-e-dīd rakhtā hai
kahāñ āñkhoñ meñ ye ġhaflat rahe ḳhvāb-e-girāñ ho kar

koī ḳhvāb sar se pare rahā ye safar sarāb-e-safar rahā
maiñ shanāḳht apnī gañvā chukā ga.ī sūratoñ kī talāsh meñ

nahīñ kuchh is se muḳhtalif giroh-e-bazm-e-raqs-o-mai
nikal gayā jo gulsitāñ meñ ḳhvāb dekhtā huā

raat ko jo bhī ḳhvāb meñ dekhā sub.h vahī ta.abīr kiyā
agle roz bhī jāgnā hogā niiñd bichārī baiThegī

isī jahāz ke sahrā meñ Duub jaane kī
ḳhabar milī thī mujhe ḳhvāb meñ ḳhazāne kī

bahut se diida o nādīda ḳhvāb sāmne the
ik aisī samt thī karvaT mire sirhāne kī

maiñ rizq-e-ḳhvāb ho ke bhī usī ḳhayāl meñ rahā
vo kaun hai jo zindagī ke imtihān meñ nahīñ

zinda insāñ use ābād kiyā karte haiñ
ghar kisī ḳhvāb se ma.amūr nahīñ ho saktā

tah karo ḳhvāb shab sameTo ab
phir safar par nikal gayā sūraj

shab-e-firāq meñ aksar maiñ le ke ā.īna
ye dekhtā huuñ ki āñkhoñ meñ ḳhvāb aatā hai

nazar karūñ huuñ to yaañ ḳhvāb kā ḳhayāl nahīñ
gire hai laḳht-e-jigar yā ki aab aatā hai

ḳhvāb dekhūñ ki ratjage dekhūñ
vahī gesū khule khule dekhūñ

kaun sā qahr ye āñkhoñ pe huā hai nāzil
ek muddat se koī ḳhvāb na dekhā ham ne

patthar jaisī āñkhoñ meñ sūraj ke ḳhvāb lagāte haiñ
aur phir ham is ḳhvāb ke har manzar se bāhar rahte haiñ

jaagā huuñ magar ḳhvāb kī dahshat nahīñ jaatī
kyā dekhtā huuñ yaar tujhe bhuul gayā maiñ

ye lāzim hai ki āñkheñ daan kar de ishq ko vo
jo apne ḳhvāb kī tābīr paanā chāhtā hai

jis jā makīn banñe ke dekhe the maiñ ne ḳhvāb
us ghar meñ ek shaam kī mehmān bhī na thī