Tags-Khwab

tirī talab ke taqāze tire husūl ke ḳhvāb
tirī talāsh bahar-e'tibār raah meñ hai

kahānī hai to itnī hai fareb-e-ḳhvāb-e-hastī kī
ki āñkheñ band huuñ aur aadmī afsāna ho jaa.e

rāh-e-talab meñ aaj ye kyā mo.ajaza huā
ḳhvāb-e-adam meñ jo bhī gayā jāgtā huā

itnā mānūs bhī hone kī zarūrat kyā thī
kabhī is ḳhvāb se mumkin hai nikalnā paḌ jaa.e

maiñ ḳhaak chhāntā huuñ āftāb dekhtā huuñ
harīm-e-dasht meñ ḳhushbū ke ḳhvāb dekhtā huuñ

ishq hamāre ḳhayāl paḌā hai ḳhvāb ga.ī ārām gayā
jī kā jaanā Thahar rahā hai sub.h gayā yā shaam gayā

kis kis apnī kal ko rove hijrāñ meñ bekal us kā
ḳhvāb ga.ī hai taab ga.ī hai chain gayā ārām gayā

jaane kis rut meñ khileñge yahāñ ta.abīr ke phuul
sochtā rahtā huuñ ab ḳhvāb ugātā huā maiñ

kyā jaane use vahm hai kyā merī taraf se
jo ḳhvāb meñ bhī raat ko tanhā nahīñ aatā

vo ek husn thā jis kī thī sirf ḳhvāb meñ buud
use jagāne kī chāhat meñ mujh ko sonā paḌā

zindagī jis meñ saañs letī thī
vo zamāna ḳhayāl-o-ḳhvāb hai aaj

maze meñ ab talak baiThā maiñ apne hoñTh chāTūñ huuñ
liyā thā ḳhvāb meñ bosa jo yak shab seb-e-ġhabġhab kā

dil-o-nigāh ko vīrān kar diyā maiñ ne
shikast-e-ḳhvāb kā elaan kar diyā maiñ ne

ye kaun ḳhvāb meñ chhū kar chalā gayā mire lab
pukārtā huuñ to dete nahīñ sadā mire lab

bārūd ke badle hāthoñ meñ aa jaa.e kitāb to achchhā ho
ai kaash hamārī āñkhoñ kā ikkīsvāñ ḳhvāb to achchhā ho

koī ḳhvāb thā jo bikhar gayā koī dard thā jo Thahar gayā
magar is kā koī bhī ġham nahīñ jo guzar gayā so guzar gayā

aa.ī bhī to kyā nigār-e-ta.abīr
oḌhe hue ḳhvāb kī ridā sī

kis ḳhvāb kā asar hai jo ab tak nazar meñ hai
manzil kī ek shabīh ġhubār-e-safar meñ hai

maiñ apnī zaat kī tafsīr karne vaalā kaun
maiñ ek ḳhvāb huuñ ta.abīr karne vaalā kaun

mausam to ka.ī aa.e magar ḳhvāb hamāre
sūkhe hue pattoñ kī tarah girte rahe haiñ