Tags-Khwab

havas-e-ḳhalvat-e-ḳhurshīd-o-nishāñ aur sahī
duur hai sub.h to ye ḳhvāb-e-girāñ aur sahī

merī rātoñ se pare duur vo mahtāb sā jism
us ko sochūñ to mire ḳhvāb bhī jal jaate haiñ

lāzmī to nahīñ 'sāhir'! vo mujhe mil jaa.e
ya.anī har ḳhvāb kī takmīl nahīñ ho saktī

jaage hue firāq ke sote haiñ zer-e-ḳhāk
bad-ḳhvāb hoñ ke ham jo farishte jagā.eñge

tumhāre dair-o-haram ke jalve tumheñ mubārak tumhīñ sambhālo
mujhe haqīqat kī justujū hai maiñ ḳhvāb-zāroñ kā kyā karūñgā

ummīd-e-sukūñ kā zikr-e-ra.anā
sab ḳhvāb-o-sarāb ho gayā hai

ḳhvāb ke gaañv meñ pale haiñ ham
paanī chhalnī meñ le chale haiñ ham

jism thaktā nahīñ chalne se ki vahshat kā safar
ḳhvāb meñ naql-e-makānī kī tarah hotā hai

tumhārī āñkhoñ pe ḳhushbū utar chukī lekin
hameñ to ḳhvāb tak aa.e haiñ zard beloñ ke

balā kī pyaas thī hadd-e-nazar meñ paanī thā
ki aaj ḳhvāb meñ sahrā thā ghar meñ paanī thā

kuchh din to baso mirī āñkhoñ meñ
phir ḳhvāb agar ho jaao to kyā

yahāñ to raat kī bedāriyāñ musallam haiñ
magar vahāñ bhī hasīñ añkhḌiyoñ meñ ḳhvāb nahīñ

kisī mai-kada meñ rahā 'jigar' ki thā mahv-e-ḳhvāb meñ raat bhar
huiiñ kyā bashārateñ sub.h-dam ki uThā to zamzama-ḳhvāñ uThā

bahār aa.egī dil ko hai ab yaqīn mire
ḳhayāl-o-ḳhvāb meñ phūloñ ke kārvāñ dekhūñ

merī nigāh meñ bhī ḳhvāb terī nigāh meñ ḳhvāb
ek hī dhun basī huī asr-e-ravāñ ke sar meñ thī

raat guzrī ki shab-e-vasl kā paiġhām milā
so ga.e ḳhvāb kī bāñhoñ meñ jo ārām milā

muḳhtasar ye hai ki jab vaqt-e-vidā-e-gul thā
ḳhvāb meñ aa ke gale mujh se vo gulfām milā

saarī rāheñ sabhī socheñ sabhī bāteñ sabhī ḳhvāb
kyuuñ haiñ tārīḳh ke be-rabt havāloñ kī tarah

ḳhvāb meñ ho to ye dil dekhe tirī diid ke ḳhvāb
ḳhvāb se jaage to ik ḳhvāb sī duniyā dekhe

hasrat se tirī chashm kī nargis ne chaman meñ
paa.ī hai kisī dīda-e-be-ḳhvāb kī mīrās