Tags-Khwab

aur kuchh haath na aayā to mirī āñkhoñ ne
chun liye ḳhvāb hī bikhre hue shīrāze se

phir ek shaam dar-e-dil pe dastakeñ jāgīñ
aur ek ḳhvāb ke hamrāh nāma-bar aayā

ye kis dayār ke qisse sunā rahe ho 'naved'
ye kis hasīn kā ā.ankhoñ meñ ḳhvāb dar aayā

jhulas ga.e nigāh ke tamām ḳhvāb aañch se
ye dāstān hai nazar pe raushnī ke vaar kī

tum ḳhvāb meñ bhī na aa.e phir haa.e
kyā ḳhvāb meñ umr kho chuke ham

kis ko ḳhabar ye hastī kyā hai kitnī haqīqat kitnā ḳhvāb
dasht-e-fanā meñ hairāñ haiñ sab le kar apnā apnā ḳhvāb

lipTī huī thī ham se kaisī ḳhushbū us kī yādoñ kī
aañkh khulī tab jaanā ham ne dekhā thā ik pyārā ḳhvāb

us ke tasavvur meñ qurbat ke dhoke kitne khaa.e haiñ
paas jo aa.e aisā lage hai aadhī haqīqat puurā ḳhvāb

kho kar us ko yuuñ lagtā hai jaise sab kuchh haar ga.e
ashkoñ se ham joḌ rahe haiñ apnā bikhrā bikhrā ḳhvāb

dukh to yahī hai in bātoñ se tum kitne anjān rahe
dil meñ basā kar tum ko ham ne dekhā kaisā kaisā ḳhvāb

dekh ke is ko jaane aisī 'sayyad' jī kyā baat huī
āñkhoñ kī dahlīz pe ham ne pyaar bharā ik rakkhā ḳhvāb

ḳhvāb meñ bhī use na chhū paa.e
ham se pūchho ki bebasī kyā hai

hazār ḳhvāb luTe ḳhvāb dekhnā na gayā
yahī thā apnā muqaddar to phir mafar kyā thā

dekh letā huuñ jo kuchh der tirī āñkhoñ ko
terī āñkhoñ se mire ḳhvāb badal jaate haiñ

andhā safar hai ziist kise chhoḌ de kahāñ
uljhā huā sā ḳhvāb hai tābīr kyā kareñ

us kī āñkhoñ pe maan thā hī nahīñ
ḳhvāb the ḳhvāb-dān thā hī nahīñ

ik kamrā sāyoñ se bharā hai ik kamrā āvāzoñ se
āñgan meñ kuchh ḳhvāb paḌe haiñ vaise ye ghar ḳhālī hai

pyāsā jo mere ḳhuuñ kā huā thā so ḳhvāb thā
nīndoñ meñ zahr ghol rahā thā so ḳhvāb thā

kāñTā jo dil ke paar hai tābīr hai so ye
sahrā meñ ik gulāb khilā thā so ḳhvāb thā

ik iltijā thī āñkhoñ meñ pathrā ke rah ga.ī
ik aks sañg-e-dar pe khaḌā thā so ḳhvāb thā