Tags-Khwab

ho sakī haiñ kab ḳhayāloñ kī ham-āhañgī kī zāmin qurbateñ
ek hī bistar pe sone vāloñ ke bhī apne apne ḳhvāb the

manzar se udhar ḳhvāb kī paspā.ī se aage
maiñ dekh rahā huuñ had-e-bīnā.ī se aage

bhaTak na jaa.e kahīñ shahr-e-ġham meñ apnā dil
so tere ḳhvāb ko maiñ rahnumā banātā huuñ

muddat ke ba.ad ḳhvāb meñ aayā thā merā baap
aur us ne mujh se itnā kahā ḳhush rahā karo

raat bhar phir hijr kā mausam rahā
jis ko aanā thā vo ḳhvāb aayā nahīñ

ḳhvāb ke parde meñ aatā hai
sotā pā ke jagāne vaalā

kal tak thī ḳhuld ḳhāna-zād-e-dehlī
hai ḳhvāb-o-ḳhayāl aaj yād-e-dehlī

ummīdoñ se parda rakkhā ḳhushiyoñ se mahrūm rahīñ
ḳhvāb marā to chālis din tak sog manāyā āñkhoñ ne

palkoñ ke Daale niiñd ne parde
kis darīche se ho ke ḳhvāb aa.e

ye misra.a likh diyā zālim ne merī lauh-e-turbat par
jo ho furqat kī betābī to yuuñ ḳhvāb-e-girāñ kyuuñ ho

āñkhoñ se jab ye ḳhvāb sunahre utar ga.e
ham dil meñ apne aur bhī gahre utar ga.e

tujh pe likkhī to saj ga.ī hai ġhazal
aa milā ḳhvāb se ḳhayāl kahāñ

phir tire ḳhvāb dekhne ke liye
ham ne bistar pe chhoḌ dī āñkheñ

dekhegā ḳhvāb meñ bhī na vo sūrat-e-sukūñ
jis ko ḳhudā se chashm-e-ināyat nahīñ rahī

chandā chamke kaliyāñ chaTkīñ phuul khileñ
jis din us ko dekheñ ḳhvāb ajab dekheñ

koī chehra koī mahtāb dikhā.ī detā
niiñd aatī to koī ḳhvāb dikhā.ī detā

na ab tilism-e-bahārāñ na ab fusūn-e-jamāl
vo lamhe ḳhvāb hue ḳhvāb bhuul jaa.e sabā

yuuñ bhī apnā ahd-e-javānī ḳhvāb thā dilkash chehroñ kā
aur ġhubār-e-vaqt ne to vo chehre bhī dhundlā.e phir

dil meñ ho aas to har kaam sambhal saktā hai
har añdhere meñ diyā ḳhvāb kā jal saktā hai

mire vajūd ke sāhil pe ḳhvāb bunte haiñ
tumhāre haath shab-e-mehrbāñ banāte hue