Tags-Khwab

tumhāre saath rifāqat ke ḳhvāb buntī huuñ
maiñ tā.eroñ ke liye āshiyāñ banāte hue

maiñ aise shaḳhs ko zindoñ meñ kyā shumār karūñ
jo sochtā bhī nahīñ ḳhvāb dekhtā bhī nahīñ

band āñkheñ karūñ aur ḳhvāb tumhāre dekhūñ
taptī garmī meñ bhī vaadī ke nazāre dekhūñ

us ke lahje meñ darāḌ aatī hai aur maiñ usī vaqt
ḳhvāb rakh detā huuñ ḳhadshāt uThā letā huuñ

shab kī dahlīz se us samt haiñ rāheñ kaisī
parda-e-ḳhvāb meñ ye kaisā safar rakkhā hai

din-bhar ḳhvāb nazar aate haiñ mahloñ ke
shaam Dhale fōt-pāth pe bistar lagtā hai

mire baġhair haiñ sab ḳhvāb us ke vīrāñ se
ye baat sach hai mirā baap kam nahīñ maañ se

rāt-rānī ban vo aa.e ḳhvāb meñ phir
mahkī in sāñsoñ ko har shab phuul kahiye

tamām ḳhvāb tire gal na jaa.eñ is meñ hī
yuuñ har samay na mire yaar āñkheñ khārī rakh

vo jis kā aks lahū ko jagā diyā kartā
maiñ ḳhvāb ḳhvāb meñ us ko sadā diyā kartā

koī ajiib ḳhvāb thā agar maiñ yaad kar sukūñ
koī ajiib baat thī magar vo dhyān meñ nahīñ

maiñ rizq-e-ḳhvāb ho ke bhī usī ḳhayāl meñ rahā
vo kaun hai jo zindagī ke imtihān meñ nahīñ

vo ḳhvāb shām-e-hijr meñ sahar kī aas thā mujhe
magar vo tere vasl kī khulī amaan meñ nahīñ

gūñgī bahrī basāratoñ ke liye
ḳhvāb likkhe the imtihān meñ kyā

pūchhte kyā ho in āñkhoñ kī udāsī kā sabab
ḳhvāb jo dekhe vo ḳhvāboñ kī haqīqat māñge

uThā parda rū-e-gumāñ se jab to khulā ajab hī tilsim-e-shab
vo tamām chehre bhī ḳhvāb the vo sab aa.ine bhī ḳhayāl the

sunte aa.e haiñ bahut zikr hasīñ ḳhvāboñ kā
ab kisī ḳhvāb kī ta.abīr ġhazal meñ aa.e

ḳhvāb thā armān thā kyā kuchh tirī palkoñ pe thā
vo hamārā zikr jo kal tak tire hoñToñ pe thā

afsāne se bigāḌ hai an-ban hai ḳhvāb se
hai fikr-e-vasl o zikr-e-judā.ī tamām shab

tumhāre ba.ad na takmīl ho sakī apnī
tumhāre ba.ad adhūre tamām ḳhvāb lage