Tags-Khwab

ḳhvāb-āvar goliyoñ se ai 'shu.ūr'
ḳhud-kushī kī koshisheñ kartā huuñ maiñ

sun kar vo mājrā-e-dil-e-zār bol uThe
ye vāqi.a nahīñ hai karishma hai ḳhvāb kā

ḳhvāb merā hai ain bedārī
maiñ to us meñ bhī dekhtā kuchh huuñ

detī hai vahshat-e-dil phir mujhe ta.abīr-e-bahār
jalva-gar ḳhvāb meñ rahne lagī tasvīr-e-bahār

ḳhvāb ehsās nazar yaad tasavvur dhaḌkan
maiñ ne tere liye rakkhe haiñ Thikāne kitne

jab bhī ta.abīr kī āñkhoñ se milā.īñ āñkheñ
ruuh ko chhed ga.e ḳhvāb suhāne kitne

ḳhabar milī hai ki tū ḳhvāb dekhtī hai abhī
ḳhabar milī hai tirī samt phuul khilte haiñ

kisī ko ḳhvāb meñ akasr pukārā jaatā hai
'atā' isī liye sote meñ hoñT hilte haiñ

us se kahnā ki burā ḳhvāb thā ab yaad nahīñ
mere baare meñ jo pūchhe kabhī duniyā tujh se

is kī judā.ī kaise kamālāt kar ga.ī
vo ḳhvāb ban ke mujh se mulāqāt kar ga.ī

kis taur se āḳhir unheñ tasvīr kareñ ham
jo ḳhvāb azal se koī chehra nahīñ rakhte

kyā soch ke zinda haiñ tire dasht meñ ye log
āñkhoñ meñ jo ik ḳhvāb kā TukḌā nahīñ rakhte

ik lamhe ne mujh se kahā thā tū hī azal hai tū hī abad hai
lamha biitā baat ga.ī is ḳhvāb se kab kā chauñk uThā huuñ

maiñ ḳhvāb dekhtā huuñ
aur inheñ kāġhaz par likhtā huuñ

log kāġhaz se mere ḳhvāb chāTte haiñ
aur hoñToñ par zabān pherte hue kahte haiñ

dekhte kuchh haiñ dikhāte hameñ kuchh haiñ ki yahāñ
koī rishta hī nahīñ ḳhvāb kā tābīr ke saath

ḳhudā kare ki kabhī bhī na TūTne paa.e
ye terā merā milan ek ḳhvāb jaisā hai

shaam piilī raakh meñ ḳhūn-e-shafaq kā injimād
raat jaise ḳhvāb-e-yaḳh-basta hoñ din akḌe hue

raat kaalī raat peḌoñ ko hilātī āñdhiyāñ
aur ham baiThe tanāb-e-ḳhvāb haiñ pakḌe hue

kyā jaane aaj ḳhvāb meñ kyā dekhā 'yās' ne
kyuuñ chauñkte hī aap se begāna ho gayā