Tags-Khwab

khulā lab-e-gor se ye uqda ki ḳhvāb thī sab numūd-e-hastī
vuqūf nā-mahrūmī-e-manzil kamāl hai merī justujū kā

ajiib ḳhvāb sā dekhā ki puure dariyā meñ
koī jahāz kahīñ hai na koī lañgar hai

ab un ke sire kahāñ mileñge
TuuTe haiñ jo ḳhvāb zalzaloñ meñ

roz uḌā de niiñd
talḳhī bharā ik ḳhvāb

is se pahle ki Dhale raat nayā din nikle
tire ḳhvāboñ ko mire ḳhvāb meñ Dhalnā hogā

vādiyoñ meñ to kisī ḳhvāb kī bhaTke hai 'faroġh'
tujh ko ta.abīr ke sahrā meñ bhī jalnā hogā

vahāñ va.ade hote haiñ aa.e din sar-e-shām ḳhvāb meñ ā.eñge
yahāñ iztirāb-e-tamām se mirī shab kī niiñd harām hai

gul o mahtāb likhnā chāhtā huuñ
maiñ apne ḳhvāb likhnā chāhtā huuñ

mujhe banā ke tirī aañkh khul ga.ī jaise
bikhar gayā huuñ yahāñ ḳhvāb-e-rā.egāñ sā maiñ

ye mirī saltanat-e-ḳhvāb hai ābād raho
is ke andar koī bahrām nahīñ aa saktā

vahī haqīqat-e-umr-e-darāz ban ke rahe
kisī ne ḳhvāb diye the jo chand pal ke mujhe

maiñ bhī Duubā huuñ āsmānoñ meñ
ḳhvāb meñ mahv-e-yās ho tum bhī

ḳhvāb ke shahr meñ bhaTkegā ḳhayāloñ kā safīr
merī tasvīr mirā ḳhat bhī sirhāne rakh le

shab kī bahār sub.h kī nudrat na pūchhiye
kitnā hasīñ hai ḳhvāb-e-mohabbat na pūchhiye

bedāriyāñ haiñ dīda-e-zanjīr kī tarah
vo aañkh hai azal se jo mahrūm-e-ḳhvāb hai

ai shor-e-hashr Thahar ki fursat nahīñ hameñ
haiñ ġhaflatoñ ke josh javānī kā ḳhvāb hai

āñkhoñ ko atā ḳhvāb kiye shukriya lekin
paikar bhī koī ḳhvāboñ meñ Dhalne ke liye de

aañkh meñ ḳhvāb zamāne se alag rakkhā hai
aks ko ā.ina-ḳhāne se alag rakkhā hai

ḳhvāb hī ḳhvāb meñ ta.amīr kiyā hai 'āzar'
ghar ko buniyād uThāne se alag rakkhā hai

is ko bhar lenā apnī āñkhoñ meñ
ik haqīqat ko ḳhvāb kar lenā