Tags-Khwab

aanā hai yuuñ muhāl to ik shab ba-ḳhvāb aa
mujh tak ḳhudā ke vāste zālim shitāb aa

havā sahar kī hai in dinoñ meñ
badalte mausam ke ḳhvāb jaisī

samundar jis kī āñkhoñ kā ho ḳhālī
vo kaise ḳhvāb dekhe jal-parī kā

raat ko baaġh meñ mulāqāteñ
yaad haiñ jaise ḳhvāb kī bāteñ

chalo achchhā huā
ki mere ḳhvāb kī

rū-e-gul chehra-e-mahtāb nahīñ dekhte haiñ
ham tirī tarah koī ḳhvāb nahīñ dekhte haiñ

maiñ niyāz-mand-e-junūñ sahī mujhe aql se bhī hai vāsta
kisī ḳhvāb kī na jhalak dikhā tire paas kyā hai dikhā mujhe

nīndoñ meñ phir rahā huuñ use DhūñDhtā huā
shāmil jo ek ḳhvāb mire rat-jage meñ thā

kyā kahiye nazar aatī hai kyuuñ ḳhvāb ye duniyā
kyā jāniye kis ḳhvāb se bedār hue haiñ

us kā to ek lafz bhī ham ko nahīñ hai yaad
kal raat ek sher kahā thā jo ḳhvāb meñ

phir aarzū ke khañDar rañg-o-bū meñ Duub chale
fareb-ḳhurda koī ḳhvāb dekhtā hogā

nadī ke paar ujālā dikhā.ī detā hai
mujhe ye ḳhvāb hamesha dikhā.ī detā hai

zard zabūr tilāvat kartī hai tasvīr ḳhizāñ kī
ain-bahār meñ kaise kaise ḳhvāb nazar aate haiñ

gandum aur gulāboñ jaise ḳhvāb shikasta karte
dūr-darāz zamīnoñ vaale shahr meñ dar aate haiñ

mere hāthoñ meñ agar taqdīr-e-sub.h-o-shām ho
titliyāñ ta.abīr kī rakh duuñ kitāb-e-ḳhvāb meñ

ghar meñ kaisā shafaqistāñ kā samāñ thā pahle
mauj-e-sad-rañg meñ be-ḳhvāb jahāñ thā pahle

vo ḳhvāb ḳhvāb fazā-e-tarab nahīñ aa.ī
ajiib hī thī vo shab phir vo shab nahīñ aa.ī

hamārī āñkhoñ meñ ik aisā ḳhvāb simTā hai
pa.e surūr palak par palak nahīñ rakhte

ufaq ko taktī haiñ muddat se be-shumār āñkheñ
sahar kā ḳhvāb liye sab umīd-vār āñkheñ

bedāriyoñ meñ aa.iiñ nazar ye to hai muhāl
maḳhfī haiñ vaqt-e-ḳhvāb ba-dastūr piñDliyāñ