Tags-Khwab

sahar kī dhundlī sī raushnī meñ tamām din kī basīrateñ huuñ
shu.ūr bedār karne vaale hamārī āñkhoñ meñ ḳhvāb rakhnā

ghar aur ghar ke ḳhvāb se hijrat ke ba.ad bhī
kyuuñ bām-o-dar ke dhoke meñ rakkhā gayā mujhe

vahī chashma-e-baqā thā jise sab sarāb samjhe
vahī ḳhvāb mo'tabar the jo ḳhayāl tak na pahuñche

vo misāl-e-ḳhvāb-e-manzar na lage palak palak se
koī ḳhvāb phir na jaage mujhe ye patā nahīñ thā

na koī ḳhvāb āñkhoñ meñ na dil meñ aasrā koī
na jū-e-ḳhūñ se bachne kā nazar meñ rāsta koī

use mismār karne meñ koī mushkil nahīñ hogī
pasand aa.ī hai shahr-e-ḳhvāb kī ta.amīr miTTī ko

kamāl apnā dikhā.egā tilismī aa.ina 'sājid'
ki ab darkār hai ik ḳhvāb kī ta.abīr miTTī ko

us ke afsūñ us ke fasāne donoñ ko mas.hūr rakheñ
aql-o-junūñ kī dahlīzoñ par ḳhvāb kā pahra kaafī hai

ḳhvāb hī ḳhvāb meñ kaTī umr tamām jal bujhī
terā kahā mirā sunā ek diyā aur ek phuul

pāgal āñkhoñ vaalī laḌkī
itne mahñge ḳhvāb na dekho

ḳhvāb dekhā thā kahāñ chamkī hai ta.abīr kahāñ
hashr kā din mirī fitrat kā ujālā niklā

ik haqīqat ke ruup meñ aa kar
mujh ko ḳhvāb-o-ḳhayāl kar Daalā

sadā.eñ detī huī ḳhalā.eñ kahīñ zamīnoñ tak aa na jaa.eñ
ye ḳhvāb-kārī-e-pur-takalluf barā-e-ta.abīr kar rahe haiñ

saarā din be-kār baiThe shaam ko ghar aa ga.e
ḳhvāb meñ chalne lage dīvār se Takrā ga.e

maiñ ḳhvāb meñ bhī tirī galī se nahīñ guzartā
ye donoñ talvoñ meñ surḳh chhālā kahāñ se aayā

lahū kī lahr meñ ik ḳhvāb-e-dil-shikan bhī gayā
phir us ke saath hī āñkheñ ga.iiñ badan bhī gayā

hameñ ab ḳhvāb meñ jiinā paḌegā
ye saudā to bahut mahñgā paḌegā

ik ḳhvāb kī aahaT se yuuñ guuñj uThīñ galiyāñ
ambar pe khile taare bāġhoñ meñ hañseñ kaliyāñ

maiñ apne ḳhvāb se kaT kar jiyūñ to merā ḳhudā
ujaaḌ de mirī miTTī ko dar-ba-dar kar de

ye zamīñ ḳhvāb hai āsmāñ ḳhvāb hai
ik makāñ hī nahīñ lā-makāñ ḳhvāb hai