Tags-Khwab

kahkashāñ so rahī hai ai 'shabnam'
husn āñgan meñ mahv-e-ḳhvāb nahīñ

chīḳhnā chāhtī huuñ chīḳh nahīñ paatī huuñ
ḳhvāb hotā thā haqīqat ko bhī manzūr huā

fikr-e-jamīl ḳhvāb-e-pareshāñ hai āj-kal
shā.er nahīñ hai vo jo ġhazal-ḳhvāñ hai āj-kal

ek duniyā mirī ābād hai jin se vahī ḳhvāb
kabhī paspā kabhī barbād bhī ham karte haiñ

lahū meñ aap jal uThtī hai koī sham-e-ḳhalvat sī
visāl-andāz us ke ḳhvāb meñ jab raat Dhaltī hai

maiñ banā rahā huuñ ḳhayāl-o-ḳhvāb kī bandisheñ
mirī bandishoñ ko rivāj hī nahīñ mil rahā

kab se banjar thī nazar ḳhvāb to aayā
shukr hai dasht meñ sailāb to aayā

niiñd hai aur na ḳhvāb āñkhoñ meñ
utrā kaisā azaab āñkhoñ meñ

us ne to dekhe an-dekhe ḳhvāb sabhī lauTā.e
aur the shāyad TuuTī huī tābīr banāne vaale

bhaTkā huā ḳhayāl hai uqbā kaheñ jise
bhūlā huā sā ḳhvāb hai duniyā kaheñ jise

dastak-e-hijr se TuuTī thī mirī niiñd so ab
raat bhī baaqī hai aur ḳhvāb kā dar band bhī hai

jhuuT hai sab tārīḳh hamesha apne ko dohrātī hai
achchhā merā ḳhvāb-e-javānī thoḌā sā dohrā.e to

sab baḌe zo.am se aa.e the na.e sūrat-gar
sab ke dāman se vahī ḳhvāb purāne nikle

ai shoḳhi-e-nigāh-e-karam muddatoñ ke ba.ad
ḳhvāb-e-girān-e-ġham se mujhe kyuuñ jagā diyā

kaun sī manzil hai jo be-ḳhvāb āñkhoñ meñ nahīñ
ek sūraj DhūñDhtā huuñ jo ki sapnoñ meñ nahīñ

internet-asthān pe baiThī ḳhvāb kī malka!
maḳhmal sī poroñ se kitne roz bunogī?

vo ḳhvāb thā ki vāhima bas itnā yaad hai
bāhar safed o surḳh thā andar siyāh thā

dast-e-imkāñ meñ koī phuul khilāyā jaa.e
ḳhema-e-ḳhvāb meñ ta.abīr ko laayā jaa.e

mirī ārzūoñ ke ḳhvāb the ki fazā-e-husn-o-shabāb the
kahīñ nik.hatoñ meñ bikhar ga.e kahīñ rañg-o-nūr meñ Dhal ga.e

āvāra haiñ is aañkh se us aañkh talak ḳhvāb
jaise ki musāfir kā koī ghar nahīñ hotā