Tags-Khwab

hamārī āñkhoñ se ḳhvāb o ḳhas ke tamām pushte haTā.e jaa.eñ
hamārā nārāz pāniyoñ se muāhida ḳhatm ho gayā hai

mizha pe ḳhvāb nahīñ intizār sā kuchh hai
bahār to nahīñ aks-e-bahār sā kuchh hai

ḳhayāl-o-ḳhvāb hue sab visāl ke lamhe
nazar meñ sirf chamaktā ġhubār sā kuchh hai

shab-e-furqat meñ jitne ḳhvāb bhī milne ke dekhe the
agar ta.abīr miltī to ujālā ho gayā hotā

ham ne ab ik aur mohabbat kar lī hai
āñkhoñ ko phir ḳhvāb dikhāne lag ga.e haiñ

ai mire ḳhvāb kī dil-kash pariyo
gungunātī huī zulfoñ kī ghaTā

vo vaqt bhī ajiib thā hairān kar gayā
vāzeh thā zindagī kī tarah aur ḳhvāb thā

apnī ā.ankhoñ par vo nīndoñ kī ridā oḌhe hue
so rahā hai ḳhvāb kā ik silsila oḌhe hue

ham yahī ḳhvāb dekhte haiñ 'asad'
un ke shāne pe rakh ke sar so.eñ

tujh ko samajh ke ḳhvāb meñ pahuñchā maiñ jis jagah
dekhā jo aañkh khol ke to kuchh vahāñ na thā

is tarah azm-e-zohd hai ahd-e-shabāb meñ
chalne kā jaise qasd kare koī ḳhvāb meñ

merī nazar se chhup ke raheñ vo hijāb meñ
mere nadīm kyā mah-o-anjum haiñ ḳhvāb meñ

miTTī se ḳhvāb tarāshā thā so us kī ye ta.abīr milī
ab aadhā gharauñdā baaqī hai aur aadhā gharauñdā TuuT gayā

rakhnā haqīqateñ bhī nigāhoñ ke sāmne
din raat sirf ḳhvāb kā manzar na dekhnā

mastī ba-zauq-e-ġhaflat-e-sāqī halāk hai
mauj-e-sharāb yak-mizha-e-ḳhvāb-nāk hai

tab koī Duub ke paanī meñ fanā hotā hai
ḳhvāb jab talḳhī-e-hālāt meñ mar jaate haiñ

sitāre Taañk rahā hai jo ḳhvāb meñ sab ke
vo surḳhiyoñ se ḳhabar kī hī lāpata hogā

vo ḳhvāb hai to kare bas qayām āñkhoñ meñ
agar hai ḳhauf to nīndeñ mirī uḌaa.e bhī

ham diloñ ke qurb kā muñh dekhte rah jā.eñge
yaad rah jā.egī yā kuchh ḳhvāb se rah jā.eñge

dil lagāne kī jagah ālam-e-ījād nahīñ
ḳhvāb āñkhoñ ne bahut dekhe magar yaad nahīñ