Tags-Khwab

paḌā huā hai vo tārīkiyoñ ke malbe meñ
ḳhayāl-o-ḳhvāb meñ ik kahkashāñ banāte hue

ham se ġhaflat na ho to phir kyā ho
rah-rav-e-mulk-e-ḳhvāb haiñ ham log

un ko maiñ khulī āñkhoñ se ab dekh rahā huuñ
kuchh ḳhvāb mirī niiñd kī zad se nikal aa.e

phūloñ-bharī zamīñ ho ḳhushbū-bharī hoñ sāñseñ
ye aarzū bhī merī kyā ḳhvāb ho ga.ī hai

jis kī manzil ho ḳhvāb-e-dar-basta
us musāfir ke saath chaltā kaun

kitne armāñ kā lahū in meñ basā hai 'sayyad'
yuuñ to lagte haiñ sabhī ḳhvāb sunahre kitne

ḳhvāb pahlī azaan par TuuTā
ham the dariyā meñ kūdne vaale

dil ke bujhte hue zaḳhmoñ ko havā detā hai
roz aatā hai nayā ḳhvāb dikhā detā hai

har qadam ḳhaak meñ kuchh ḳhvāb milāte rahnā
hijr kī raat yahī shaġhl mazā detā hai

aur is ke darmiyāñ lagtā hai jaise ḳhvāb dekhā ho
hamāre paas aane se hamāre duur hone tak

ho ga.e tahlīl sab manzar chhuā jab aa.ina
khul gayā ye bhed aks-e-ḳhvāb thā phailā huā

shafaq kā rañg kā ḳhushbū kā ḳhvāb thā maiñ bhī
parā.e haath meñ koī gulāb thā maiñ bhī

tulū-e-sub.h ġham-e-zindagī ko zid ye hai
ki mere ḳhvāb ke lamhe ġhurūb ho jaa.eñ

ham hijr kī kaalī rātoñ meñ jab bistar-e-ḳhvāb pe jaate haiñ
maazī ke tamām masā.ib ik ik kar ke sāmne aate haiñ

go husn kī sūrat haiñ mirī samt ravāñ bhī
ik ḳhvāb sī lagtī haiñ mujhe raushaniyāñ bhī

kuchh usūloñ kā nasha thā kuchh muqaddas ḳhvāb the
har zamāne meñ shahādat ke yahī asbāb the

ab vo ḳhvāb meñ dulhan ban kar
mere paas chalī aatī hai

ḳhvāb jo dekhe the maiñ ne vo bhī ab dhundlā ga.e
ab to tum aa jaao sāhab ab bahut tanhā huuñ maiñ

aa.ina hairatoñ kā ḳhvāb nahīñ
ḳhud se aage bhī ḳhud ko pāoge

un sā maġhrūr aur pursish-e-hāl
ḳhvāb hai ye jo dekhtā huuñ maiñ