Tags-Khwab

maiñ nadī niiñd kī aur vo mujh meñ
ḳhvāb machhlī kī tarah rahtī hai

merī āñkhoñ meñ ka.ī ḳhvāb adhūre haiñ abhī
kyā mukammal inheñ tābīr kiyā jā.egā

tum bhī har shab diyā jalā kar palkoñ kī dahlīz pe rakhnā
maiñ bhī roz ik ḳhvāb tumhāre shahr kī jānib bhejūñgā

ḳhvāb musāfir lamhoñ ke haiñ saath kahāñ tak jā.eñge
tum ne bilkul Thiik kahā hai maiñ bhī ab kuchh sochūñgā

halqa-e-ḳhvāb ko hī gird-e-gulū kas Daalā
dast-e-qātil kā bhī ehsāñ na divāne se uThā

ḳhvāb kāġhaz ke safīne haiñ bachā.eñ kaise
ḳhatm is aag ke dariyā kā safar kab hogā

sadā-e-gumbad-e-ta.abīr sun rahā huuñ maiñ
fazā-e-ḳhvāb meñ kirnoñ kā jaal raushan hai

ḳhayāl-o-ḳhvāb kī duniyā se ham guzar bhī ga.e
jahāñ Thaharnā thā ham ko vahāñ Thahar bhī ga.e

nafas nafas hai mo.attar nazar nazar shādāb
ki jaise aaj vo ḳhvāb-e-sahar se guzre haiñ

dekhtā huuñ use thī jis kī tamannā mujh ko
aaj bedārī meñ hai ḳhvāb-e-zuleḳhā mujh ko

ab jo niklā huuñ tire ḳhvāb liye
tā-ba-imkān-e-nazar jā.ūñgā

tum ne dekhā hai vahī ḳhvāb jo maiñ ne dekhā
is ko kahte haiñ mohabbat kā asar dekheñ to

apnā ye sheva to nahīñ thā apne ġham auroñ ko sauñpeñ
ḳhud to jāgte yā sote haiñ us ko kyuuñ be-ḳhvāb kiyā hai

ye kaun niind meñ aakar sirhāne baiTh gayā
maiñ apnā ḳhvāb kisī ko batāne vaalā nahīñ

ik ek se ye pūchhte phirte haiñ ab 'nizām'
vo ḳhvāb kyā hue vo manāzir kidhar ga.e

faqat ek dhun thī ki rāt-din isī ḳhvāb-zār meñ gum raheñ
vo surūr aisā surūr thā vo ḳhumār aisā ḳhumār thā

aur manzar haiñ bahut chashm-e-ḳharīdār meñ ab
ḳhvāb bikte hī nahīñ shahr ke bāzār meñ ab

jab chalo rāh-e-haqīqat pe koī
ḳhvāb āñkhoñ meñ basā rahne do

kabhī to ḳhvāb bhī ta.abīr pā sakeñ apne
ye dā.eroñ kā safar jo tamām ho jaa.e

dosto rakkho haqīqat par nazar
ḳhvāb āñkhoñ meñ kabhī paltā nahīñ