Tags-Khwab

ḳhvāb kyā thā jo mire sar meñ rahā
raat bhar ik shor sā ghar meñ rahā

dar-ba-darī kā hameñ ta.ana na de ai chashm-e-ġhazāl
dekh vo ḳhvāb ki jis ke liye ghar se nikle

sachche ḳhvāb aur jhūTī āñkheñ
andhe rastoñ kī hamrāhī

chāhā thā jise vo mil bhī gayā par ḳhvāb bhare haiñ āñkhoñ meñ
ai mere lahū kī lahar batā ab kaun se maiñ aalam meñ huuñ

jo likkhe vo ḳhvāb mire ab āñkhoñ āñkhoñ zinda haiñ
jo ab tak nahīñ likh paayā maiñ un ḳhvāboñ ke ġham meñ huuñ

nahīñ hai ḳhvāb dīvāne kā hastī
ye duniyā sirf ik dhokā nahīñ hai

maiñ us se ḳhvāb ke raste pe milne aayā huuñ
magar vo niiñd se bedār hone vaalā hai

ḳhvāb se kaam thā vahāñ ki jahāñ
ḳhvāb kā koī kaam thā hī nahīñ

ham ne apnī āñkhoñ meñ ḳhvāb kuchh sajā.e haiñ
apnā bhī ta.alluq hai ziist ke gharāne se

tujhe jaan kar ye patā chalā tū maqām-e-dīd meñ aur thā
ka.ī marhale haiñ fareb ke mirī aañkh se mire ḳhvāb tak

rah gayā ḳhvāb-e-dil-ārām adhūrā kis kā
Dhal ga.ī shab to khulā hai ye darīcha kis kā

ye vāqi.a hai ki dekhā thā ḳhvāb manzil kā
ye hādisa hai ki ab rāsta bhī yaad nahīñ

kuchh aur ho ki na ho zād-e-rāh manzil-e-shab
sahar ke ḳhvāb to āñkhoñ meñ haiñ sajā.e hue

apne bistar pe kisī raat hameñ niiñd aatī
aur phir ḳhvāb nahīñ aate zarūrat le kar

be-misāl qariyoñ ke be-kanār bāġhoñ ke
apne ḳhvāb logoñ ke ḳhvāb meñ dikhā dūñgā

ye pichhle ishq kī bāteñ haiñ
jab aañkh meñ ḳhvāb damakte the

jis umr ke ḳhvāb ḳhayāl hue
vo pichhlī umr thī biit ga.ī

aur to kyā thā bechne ke liye
apnī āñkhoñ ke ḳhvāb beche haiñ

kitne pech-o-tāb meñ zanjīr honā hai mujhe
gard meñ gum ḳhvāb kī ta.abīr honā hai mujhe

mujhe ḳhvāb-e-sarāb-e-azāb diye mirī ruuh kā naġhma chhīn liyā
āshob-e-malāl ishrat-e-jāñ 'vijdān' se kyā kyā chhīn liyā