Tags-Khwab

vo abr shabnamī thā ki nahlā gayā vajūd
maiñ ḳhvāb dekhtā huā alfāz se uThā

jam jā.eñgī sho.aloñ pe tumhārī āñkheñ
har sho.ale meñ ik ḳhvāb nazar aa.egā

ye tum jo mere liye ḳhvāb chhoḌ aa.ī ho
tumheñ jagāyā to hogā mirī mohabbat ne

maiñ apnī hī aarzū kī chashm-e-malāl meñ huuñ
khulā hai dar ḳhvāb kā magar dekhtā nahīñ huuñ

na sarguzisht mirī pūchh mujh se kuchh ai baḳht
tū apne ḳhvāb-e-farāġhat meñ so huā so huā

ab ke ta.abīr mas.ala na rahe
ye jo duniyā hai is ko ḳhvāb karo

kal raat ḳhvāb meñ jo muqābil thā aa.ina
merā hī qad mujhe nazar aayā baḌhā huā

ye zamīñ ḳhvāb hai āsmāñ ḳhvāb hai
ik makāñ hī nahīñ lā-makāñ ḳhvāb hai

raat ne niiñd pahnī magar
ḳhvāb kī be-libāsī rahī

jāgtī āñkhoñ meñ kaise ḳhvāb dar aane lage
rāste merī taraf le kar safar aane lage

niiñd aa.ī nahīñ ka.ī din se
ḳhvāb hone lage garāñ jānāñ

le ke aayā huuñ maiñ kuchh ḳhvāb un āñkhoñ ke liye
aa.ina bhī jinheñ patthar kī tarah lagtā hai

chehre se saraktī jaatī hai zulf un kī ḳhvāb ke aalam meñ
vo haiñ ki abhī tak hosh nahīñ aur shab hai ki Dhaltī jaatī hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

aur mat dekhiye ab adl-e-jahāñgīr ke ḳhvāb
aur kuchh kījiye zanjīr hilāne ke sivā

vo jo dekhe the maiñ ne kabhī ḳhvāb meñ
bah ga.e phuul saare vo sailāb meñ

itnī taab kahāñ hai bekas āñkhoñ meñ
sahrā meñ ab ḳhvāb sulāyā kartā huuñ

juuñ misāl us kī numūdār huī tuuñ hī 'bayāñ'
tapish-e-dil ne kiyā ḳhvāb se bedār mujhe

ālam-e-ḳhvāb-e-pareshāñ nahīñ dekhā jaatā
dil ko ehsās-ba-dāmāñ nahīñ dekhā jaatā

aaj hamāre qadmoñ meñ hai kāhkashāñ shahr-e-mahtāb
kal tak log kahā karte the ḳhvāb use dīvāne kā