Tags-Khwab

ai shahr-e-alam mirī baat to sun tū ḳhvāb mire vāpas kar de
maiñ terā karam lauTā dūñgā tū ne mirā chehra chhīn liyā

ye sūd-o-ziyāñ kī bāteñ haiñ in bātoñ meñ kyā rakkhā hai
ik ḳhvāb-e-tamannā de ke mujhe ik ḳhvāb-e-tamannā chhīn liyā

gar so ga.e to aañkh khulegī na hashr tak
ye sar-zamīñ hai ḳhvāb-fazā jāgte raho

maiñ pūchh letā huuñ yāroñ se rat-jagoñ kā sabab
magar vo mujh se mire ḳhvāb pūchh lete haiñ

vo gunah kī sarzamīñ par jannatoñ kā ḳhvāb thā
is tarah ke ḳhvāb ko to rā.egāñ honā hī thā

ḳhvāb se pahle kuchh nahīñ yaksar
jo bhī hai us ke baad hai mujh meñ

ham ek ḳhvāb liye maah o saal se guzre
hazāroñ rañj hazāroñ malāl se guzre

ek hī ruḳh kī asīrī ḳhvāb hai shahroñ kā ab
un ke mātam ek se un kī barāteñ ek sī

bahut se ḳhvāb haqīqat meñ dil-navāz na the
bahut se log chale aa rahe haiñ jannat se

yā rab hameñ to ḳhvāb meñ bhī mat dikhā.iyo
ye mahshar-e-ḳhayāl ki duniyā kaheñ jise

fusūñ-kārā nigārā nau-bahārā ārzū-ārā
bhalā lamhoñ kā merī aur tumhārī ḳhvāb-parvar

qaid huī haiñ āñkheñ ḳhvāb jazīre par
pā kar ek sazā sī kaale paanī kī

arsa-e-ḳhvāb ke asrār khuleñge tum par
apnī āvāz meñ kuchh soz rachā kar dekho

maiñ tasht-e-ḳhvāb liye haath meñ guzar ga.ī huuñ
samajh sakā na vo jis ke liye maiñ ghar ga.ī huuñ

raat kahtī hai mulāqāt na hogī apnī
tū koī ḳhvāb na maiñ niiñd kā maatā aisā

kis soz kī kasak hai nigāhoñ ke aas paas
kis ḳhvāb kī shikast umaD aa.ī hai tasht meñ

bahut dinoñ se koī dil meñ iztirāb nahīñ
samāyā āñkhoñ meñ ab aur koī ḳhvāb nahīñ

charāg apnī thakan kī koī safā.ī na de
vo tīrgī hai ki ab ḳhvāb tak dikhā.ī na de

lahū-luhān thā shāḳh-e-gulāb kaaT ke vo
huā halāk chaTānoñ ke ḳhvāb kaaT ke vo

niiñd se aa kar baiThā hai
ḳhvāb mire ghar baiThā hai