Tags-Khwab

ḳhayāl-o-ḳhvāb haiñ jis ke muāvin
use bistar meñ rahnā paḌ rahā hai

shohrat kī gard ḳhvāb ke tūfāñ ġhamoñ kī dhuul
in ke sivā hai aur zamāne ke paas kyā

jo sāmne hotā hai koī aur hai shāyad
jo dil meñ hai ik ḳhvāb-e-mulāqāt vo tum ho

niiñd TuuTī hai mire ḳhvāb kahāñ TuuTe haiñ
aks terā hī haqīqat se gumāñ tak dekhūñ

kal ḳhvāb meñ ik parī milī thī
ik bose ke ba.ad uḌ ga.ī thī

jab tire ḳhvāb se bedār huā karte the
ham kisī rañj se do-chār huā karte the

bārhā yuuñ bhī huā Duube hue ḳhvāb mire
us kī āñkhoñ se numūdār huā karte the

ik ḳhvāb ke mauhūm nishāñ DhūñD rahā thā
maiñ hadd-e-yaqīñ par bhī gumāñ DhūñD rahā thā

maiñ bhī saaya huuñ siyah raat meñ kho jā.ūñgā
tum bhī ik ḳhvāb ho pal-bhar meñ bikhar jāoge

nīñd-bharī āñkheñ bhī dhoka detī haiñ
jāgoge to ḳhvāb kahāñ se ā.eñge

in ko ḳhalā meñ koī nazar aanā chāhiye
āñkhoñ ko TuuTe ḳhvāb kā harjāna chāhiye

aur phir niiñd hī aa.ī na koī ḳhvāb aayā
maiñ ne chāhī thī mire ḳhvāb meñ aa.ī huī raat

ḳhvāb meñ tere phuul badan ko nochūñgā
apnī chīḳheñ tere andar pheñkuñgā

chāhe tum merī bīnā.ī khurach Daalo phir bhī apne ḳhvāb nahīñ chhoḌūñgā
un kī lazzat aur aziyyat se maiñ apnā koī ahd nahīñ toḌūñgā

haañ maiñ bahkāoñ kī dhund nahīñ oḌhūñgā
chāhe tum merī bīnā.ī khurach Daalo maiñ phir bhī apne ḳhvāb nahīñ chhoḌūñgā

ḳhvāb se kah do hudūd-e-chashm se bāhar na ho
aañkh se ojhal har ik ta.abīr chubhtī hai miyāñ

ḳhvāb hasrat ashk uljhan nāla-o-faryād-o-ġham
kisht-e-jāñ meñ roz fasl-e-dard ugtī hai miyāñ

rāz-e-hastī kī justujū meñ rahe
raat tābīr-e-ḳhvāb meñ guzrī

harf kī lau maiñ udhar aur baḌhā detā huuñ
aap batlā.eñ to ye ḳhvāb jidhar se kam hai

maiñ har ek shab yahī band āñkhoñ se pūchhtā huuñ sahar talak
ki ye niind kis liye uḌ ga.ī agar ek ḳhvāb nahīñ rahā