Tags-Kiss

betāb dast-e-shauq haiñ joban ke rū-ba-rū
bose meñ jaañ ba-lab tire gāloñ ke sāmne

hai but-e-ḳhuñ-ḳhār bahut tund-ḳhū
bosa ke saa.il na huā chāhiye

ek bosa kī arz par 'raunaq'
kah gayā yaar pāñch saat nahīñ

ġhash huuñ maiñ vaqt-e-bosa jo kahtā hai hañs ke vo
muñh ko haTā haTā ke ba-takrār bas jī bas

bosa dahan kā us ke na pā.eñge apne lab
dāġhī hai maiñ ne nok zabān-e-savāl kī

le ke do ruḳhsār ke bose jo māñge sab ke do
aur to de deñge bole par ye haiñ be-Dhab ke do

donoñ ruḳhsāroñ ke bose leñge ham ai sīm-tan
do hameñ is Dhab ke do tum aur do is Dhab ke do

bosa dete ho agar tum mujh ko do do sab ke do
jiibh ke do sir ke do ruḳhsār ke do sab ke do

maiñ nahīñ huuñ māñgtā das biis tum se yā pachās
sirf do bosa lab-e-shīrīñ ke hañs kar ab ke do

misal-e-yūsuf ho rahā huuñ maiñ asīr-e-chāh-e-ġham
bosa ai rashk-e-zuleḳhā do mujhe abab ke do

rozoñ meñ gar paas apne aa.e vo rashk-e-qamar
bosa ham iftār ko māñgeñ lab-e-atyab ke do

māñgte tujh se nahīñ ai gul-badan kuchh aur ham
hai agar taufīq tum bose do nām-e-rab ke do

bosa har vaqt ruḳh kā letā hai
kis qadar gesū-e-dotā hai shoḳh

bosa leveñ yā gale lag jaa.eñ āzurda na ho
chāhne vaale haiñ aur dīvāne mastāne haiñ ham

tum apne hoñTh ā.īne meñ dekho aur phir socho
ki ham sirf ek bose par qanā.at kyuuñ nahīñ karte

bosa de 'soz' ko mirī jaan
matlab terā shitāb hogā

'zafar' vo bosa to kyā degā par koī dushnām
jo tum ko sunñā ho us shoḳh-e-dil-sitāñ se suno

jo māñgā ik bosa maiñ ne un se to bole kyā tū saḌī huā hai
zarā ye bāteñ suno to logo javāb kyā hai savāl kyā hai

ek bosa hoñT par phailā tabassum ban gayā
jo harārat thī mirī us ke badan meñ aa ga.ī

bosa kaisā ik lab-e-shīrīñ se gaalī bhī na dī
aaj phir ummīd-vār-e-mehrbānī phir gayā