Tags-Kiss

dhyān ke ras meñ Duube lab
bosa bosa chehre haiñ

bosa āñkhoñ kā jo māñgā to vo hañs kar bole
dekh lo duur se khāne ke ye bādām nahīñ

dahān-e-yār ke bose kī dil ne raġhbat kī
ḳhayāl-e-ḳhām kiyā tālib-e-muhāl huā

dil pe kyā mauj-e-'nasīmī' ne mire bosa dharā-
dil kī vahshat pe takallum ne mire qabza kiyā

utnī hī baat ke kahne meñ ki ik bosa do
aah ai shoḳh jo aise hī gunāhgār hue

mere dil ko bhī na hove havas-e-bosa agar
āshnā lab se tire lab na ho paimāne kā

bosa ik us se jo māñgā to lagā kahne nahīñ
hai shash-o-panj ki takrār karūñ yā na karūñ

nahīñ haTtī tumhāre chehre se zulf
ye shāyad bosa lene par aḌī hai

'bayāñ' hai vo bādshāh-e-asrā ki jis kī dargāh-e-ḳhusravī meñ
diyā zamīn-e-adab ko bosa falak ne gardan jhukā jhukā kar

bosa liyā to husn ne sharmā ke yuuñ kahā
raushan kiye haiñ aap ne mehr-o-vafā ke lab

ek bosa na do na tiin na chaar
yaar jī munsifī ajab shai hai

bose kī to hai ḳhvāhish par kahiye kyūñki us se
jis kā mizāj lab par harf-e-savāl bāñdhe

khaa.ī hai ik na.ī miThā.ī aaj
bosa paayā hai yaar ke lab kā

āshiqoñ ke bhī laḌāne kī tujhe kyā Dhab hai
chashm-bāzī hai kahīñ bosa o paiġhām kahīñ

maze meñ ab talak baiThā maiñ apne hoñTh chāTūñ huuñ
liyā thā ḳhvāb meñ bosa jo yak shab seb-e-ġhabġhab kā

lipTā jo bosa le ke to bole ki dekhiye
ye dūsrī ḳhatā hai vo pahlā qusūr thā

kal bosa-e-pā ham ne liyā thā so na aayā
shāyad ki vo bosa hī huā ābla-e-pā

saafī dil-ġhazand kī kyā thī dam-e-bos-o-kanār
bose ko mushkil Thaharnā siine se tā naaf thā

kiyā iqrār bosa dene kā diiñ gāliyāñ tum ne
faqīr-e-ishq huuñ samjhā karam is ko bhī us ko bhī

bosa sanam kī aañkh kā lete hī jaan dī
'momin' ko yaad kyā hajrul-asvad aa gayā