Tags-Lab

ab tak aisā milā na koī dil kī pyaas bujhātā jo
yuuñ mai-ḳhāna-chashm bahut haiñ bahut haiñ yuuñ to sāqī-lab

is harīm-e-quds meñ kyā lafz o ma.anī kā guzar
phir bhī sab bāteñ pahuñchtī haiñ lab-e-fariyād kī

ḳhanda-e-lab meñ nihāñ zaḳhm-e-hunar dekhegā kaun
bazm meñ haiñ sab ke sab ahl-e-nazar dekhegā kaun

is lab pe imtihāñ ke liye mar miTe haiñ ham
jiine se pahle marne kī tadbīr kar chuke

ham kis se shukr-o-mad.h qubūl-o-duā kareñ
lab qismat-e-shikāyat-e-tāsīr kar chuke

maiñ dil-e-girafta tujhe gungunātā rahtā huuñ
bahut dinoñ se mire yaar zer-e-lab hai tū

duur us lab se jo guzre hai dil-e-pur-ḳhūñ par
jaane merā hī jigar aur ye dandāñ merā

baḳht haiñ shor ye apne hī ki vo naushīñ lab
auroñ kā chashma-e-haivāñ hai namak-dāñ merā

jab bhī aa jaa.e ḳhayāl un ko dil-e-muztar kā
lab pe be-sāḳhta aa.e vo duā huuñ maiñ bhī

khule jo lab to unhī ā.inoñ meñ hairat thī
jo dekhte the hameñ aks-e-be-zabāñ kī tarah

mil ga.e the ek baar us ke jo mere lab se lab
umr bhar hoñToñ pe apne maiñ zabāñ pherā kiyā

kashtī-e-mai kā lab-e-jū daur ho
khelnā mastoñ nivāḌā chāhiye

samundaroñ kā vo pyāsā thā aur os thī maiñ
vo abr lauT gayā jis ke lab sunahre the

zindāñ meñ bhī vahī lab-o-ruḳhsār dekhte
darvāza dekhte kabhī dīvār dekhte

naqsh-e-pā maiñ tumhāre liye baiThā huuñ
raaz siine meñ hai lab siye baiThā huuñ

jab pukāre lab-e-jāñ-baḳhsh se vo mar ga.e ham
nā-tavānoñ se na bār-e-dam-e-īsā uTThā

ab qurbat-o-sohbat-e-yār kahāñ lab o aariz o zulf o kanār kahāñ
ab apnā bhī 'mīr' sā aalam hai Tuk dekh liyā jī shaad kiyā

farsh āñkheñ kiye baiThe haiñ javānān-e-chaman
dil meñ tūfān-e-tarab lab pe mohabbat ke suḳhan

dekhā huuñ tire lab pe maiñ missī kī dhaḌī kuuñ
zulmāt pe jā chashma-e-haivāñ siiñ kahūñgā

gar yahī hai pās-e-ādāb-e-sukūt
kis tarah fariyād lab tak aa.egī