Tags-Mazi

har ek naqsh tirī yaad se munavvar thā
maiñ apne maazī meñ kal raat jab dobāra gayā

mere maazī ko andhere meñ dabā rahne do
merā maazī mirī zillat ke sivā kuchh bhī nahīñ

apne maazī ke tasavvur se hirāsāñ huuñ maiñ
apne guzre hue ayyām se nafrat hai mujhe

har dar-o-dīvār par bachpan javānī naqsh the
kab mire ghar se mire maazī kī dārā.ī ga.ī

maazī kī tanāboñ se lage dard ke ḳheme
kyā jāniye kyuuñ dīda-e-imkāñ nahīñ hote

bhulā paa.ī kahāñ maazī ko 'sarhad'
namī āñkhoñ meñ aariz tar-ba-tar se

vo chaaT letā hai dīmak kī tarah mustaqbil
tumheñ pata nahīñ maazī jo haal kartā hai

mire pīchhe bahut pīchhe
mire maazī ke lambe ġhaar meñ sāñpoñ kā Derā hai

apne maazī ke har ik ġham ko bhulā de varna
choT phir ubhregī phir dard purānā hogā

zaḳhm purāne phuul sabhī baasī ho jā.eñge
dard ke sab qisse yād-e-māzī ho jā.eñge

na maazī hamārā na mustaqbil apnā kuchh is taur se harf-e-imroz haiñ
ġham-e-dosh yā fikr-e-fardā meñ 'aḳhtar' kareñ sar ko ḳham itnī fursat kahāñ

phir hue aaj baham jām-e-gul o naġhma-e-shab
phir mire maazī ne 'mumtāz' bulāyā hai mujhe

be-samt sā ik aaj ki maazī hai na fardā
ye vaqt kā sailāb kahāñ chhoḌ gayā hai

havā ke lams ne āvāz dī hai maazī ko
bujhe se dil pe sharāre utar ke aa.e haiñ

maazī ke aa.ine meñ 'atā' koī ḳhush-adā
shikva-kunāñ thā kahtā thā sāñval to maiñ bhī huuñ

mere maazī ke regzāroñ meñ
ḳhat mile haiñ mujhe purāne do

maazī kī yādgār sahī yād-e-dil to hai
tarz-e-nashāt-e-nauha-garāñ dekhte chaleñ

aisī maazī ke samundar ne qayāmat Dhaa.ī
dil kī bastī huī vīrān ḳhudā ḳhair kare

abhī dil ko maazī kī sohbatoñ kā malāl hai
na.e shahr meñ koī āshnā nahīñ chāhtā

vo jo rahte haiñ sirf maazī meñ
kaise jāneñ ki haal kis kā thā