Tags-Mazi

na jaane kitne hī maazī ke ḳhvāb bikhre haiñ
fasurda bhīgī huī sogvār palkoñ par

yuuñ bhī aage raah kaThin hai aur athāh añdherā hai
ai maazī ke shahr-e-charāġhāñ yuuñ na mujhe pīchhe se pukār

maazī ke dhuñdlakoñ meñ maiñ kho sā gayā aksar
aise bhī risāloñ meñ afsāne nazar aa.e

shāyad abhī baaqī hai kuchh aag mohabbat kī
maazī kī chitāoñ se uThtā hai dhuāñ 'ehsāñ'

kyā nikal jā.ūñ ahd-e-māzī se
yaad bachpan dilā rahā hai koī

ham yuuñ ravāñ hoñ rāh-e-abad meñ ki sadd-e-rāh
mustaqil-e-vajūd na māzī-o-hāl ho

husn-e-ta.alluqāt kī jo yādgār the
maazī se aise lamhoñ kī ra.anā.ī maañg lo

guzrī huī sadiyoñ ko āġhāz-e-safar samjho
maazī abhī kam-sin hai fardā kī nigāhoñ meñ

mere maazī ke ufuq par chand jugnū the ki jo
haal kī tīra-shabī meñ mere kaam aate rahe

har ek sarv-e-ravāñ par gumāñ ki jaise vahī
ho merā maazī mirī yādgār guzrī bahār

uThne vaalī hai bazm maazī kī
raushnī kam hai zindagī kam hai

lab pe aish-e-ahd-e-māzī kā hai afsānā hanūz
jā chukī hai fasl-e-gul aur maiñ huuñ dīvānā hanūz

na vo sohbat-e-māzī na us kī yaad ai 'arsh'
jo kārvāñ hī nahīñ hai to phir ġhubār kahāñ

maazī kī chaukhaT pe dastak dil kī hai
yaad us kī ik adā-e-pā lage

dharā kyā hai jo ham se yād-e-māzī le ke jā.egī
jab aa jaatī hai to do ghūñT pī letī hai ḳhuuñ vo bhī

nazar aatā hai jis meñ ishrat-e-māzī kā mustaqbil
mujhe is ḳhvāb-e-ġhamgīñ se jagāne kaun aatā hai

maazī ke reg-zār pe rakhnā sambhal ke paañv
bachchoñ kā is meñ koī gharauñdā banā na ho

darīche maazī ke khulne lage to yaad aayā
yahīñ kahīñ kisī Daalī pe āshiyāna thā

baḌe muhīb nazar aa.e hāl-o-mustaqbil
jab apne maazī ko sochā hai baiTh kar tanhā

azmat-e-māzī kā dil-afroz nazzāra hai tū
mashriq-e-tahzīb kā pākīza gahvāra hai to