Tags-Mohabbat

zālim thā vo aur zulm kī aadat bhī bahut thī
majbūr the ham us se mohabbat bhī bahut thī

vāqif hī na thā ramz-e-mohabbat se vo varna
dil ke liye thoḌī sī ināyat hī bahut thī

lagtī haiñ har galī meñ mohabbat kī boliyāñ
biktī yahāñ hai jins-e-vafā kū-ba-kū na pūchh

chaleñge ham bhī mohabbat-nagar samajh ke use
gar aisī koī bhī bastī kahīñ banā.ī ga.ī

vaqt ke paas nahīñ zaḳhm-e-mohabbat kā ilaaj
vaqt ke saath ye nāsūr bhī ho saktā hai

pareshāñ ho ke dil tark-e-ta.alluq par hai āmāda
mohabbat meñ ye sūrat bhī na raas aa.ī to kyā hogā

hai muddat se be-rañg naqsh-e-mohabbat
koī rañg bharne ko jī chāhtā hai

ba-īñ ḳhud-sarī vo ġhurūr-e-mohabbat
unheñ sajda karne ko jī chāhtā hai

mohabbat meñ taḌap aaheñ aziyyat
ye sab dushvāriyāñ aksar huī hai

dil kyā kare jo raaz mohabbat kā khul gayā
maiñ kyā karūñ ki ishq hī ik nāmvar se hai

maiñ band āñkhoñ ke ā.inoñ meñ tumhārī aamad kī muntazir huuñ
chale bhī aao mirī mohabbat kā rāsta pur-ḳhatar nahīñ hai

ahl-e-zar se ye uns-o-mohabbat be-zaroñ se ye andāz-e-nafrat
khul gayā aap kā zohd-o-taqvā dekh lī aap kī pārsā.ī

vo tasanno.a hai aḳhlāq kyā hai vo numā.ish hai iḳhlās kab hai
vo mohabbat nahīñ hai riyā hai ho na jab tak diloñ meñ safā.ī

na khul paayā kabhī bāb-e-mohabbat kam-nasīboñ par
fasīl-e-shahr-e-jānāñ se ka.ī sar phoḌ aa.e haiñ

kaun aa.egā nañge pairoñ sham.a jalā kar shaam Dhale
'prem' mohabbat kī manzil ke baḌe bhayānak raste haiñ

sab kaheñge kaun kartā hai hamāre raaz faash
jab mire lab par mohabbat kī kahānī aa.egī

kiyā kāmil hameñ ik umr meñ soz-e-mohabbat ne
hue ham ātish-e-ġham se kabāb āhista āhista

mere zaḳhmoñ kī qasam shor-e-mohabbat kī qasam
apne husn-e-namak-afshāñ kā namak to dekho

jo har qadam pe añdheroñ se laḌne vaale haiñ
hamāre saath mohabbat ke vo ujāle haiñ

ḳhulūs-o-rabt-o-mohabbat jinheñ mayassar hai
vo log kaun sī duniyā ke rahne vaale haiñ