Tags-Musafir

kitne saada haiñ ye kashtī ke musāfir jin ko
nā-ḳhudāoñ kī ḳhudā.ī pe yaqīñ hotā hai

jo nafas thā vo rahā garm-e-safar
kab musāfir ko Thaharnā aayā

bahut lambī masāfat hai badan kī
musāfir mubtadī thakne lagā hai

har musāfir ko mulāqāt ye raas aa.ī hai
is mulāqāt se hastī ne jilā paa.ī hai

maiñ musāfir huuñ bayābān-e-farāmoshī kā
apne naqsh-e-kaf-e-pā se bhī shanāsā.ī nahīñ

dekh bhaTak jaa.e na musāfir aañkh kī bhūl-bhulaiyyā meñ
kis ko DhūñDe shoḳh-nazar tā-hadd-e-nazar jab kuchh bhī nahīñ

samundar par hai kyuuñ haibat sī taarī
musāfir itnā pyāsā bhī nahīñ hai

ye kah ga.e haiñ musāfir luTe gharoñ vaale
Dareñ havā se parinde khule paroñ vaale

paañv ke chhāloñ kī qīmat jāntā hai būḌhā peḌ
ik musāfir kī musībat jāntā hai būḌhā peḌ

sāneha ek nahīñ saiñkaḌoñ daftar meñ 'zahīr'
zikr us kā hai jahāñ dil sā musāfir chhūTā

lākhoñ hī musāfir chalte haiñ manzil pe pahuñchte haiñ do ek
ai ahl-e-zamāna qadr karo nāyāb na hoñ kam-yāb haiñ ham

ruuh pāband-e-anāsir hai bas itnī 'tālib'
jaise mehmān musāfir ho koī raat kī raat

har musāfir ke saath aatā hai
ik nayā rāsta hamesha se

musāfir ke raste badalte rahe
muqaddar meñ chalnā thā chalte rahe

zarā rahne do apne dar pe ham ḳhāna-ba-doshoñ ko
musāfir jis jagah ārām paate haiñ Thaharte haiñ

maiñ bhī musāfir tujh ko bhī jaldī
gaaḌī kā bhī vaqt huā thā

paañv meñ lipTī huī hai sab ke zanjīr-e-anā
sab musāfir haiñ yahāñ lekin safar meñ kaun hai

havā ke zor se jab bādbān phaTne lage
musāfir apne ḳhudāoñ ke naam raTne lage

pyaar kī pahlī manzil par anjān musāfir dekh rahā hai
āñkhoñ meñ sañgīn ujāle aur sayyāl añdhere dil meñ

arbāb-e-junūñ meñ haiñ kuchh ahl-e-ḳhirad shāmil
har ek musāfir se manzil ko na pūchhā kar