Tags-Naqab

ab ishq ko be-naqāb kar ke
maiñ husn ko aazmā rahā huuñ

kuchh haqā.eq ko agar maiñ ne kiyā hai be-naqāb
ho ga.e nārāz mujh se sher ke nabbāz kyuuñ

ye aalam ho to un ko be-hijābī kī zarūrat kyā
naqāb uThne na paa.e aur jalva aam ho jaa.e

nazzāra-e-jamāl kī yaañ taab hī nahīñ
ai barq-e-husn chāhiye tujh ko naqāb kyā

hai maah ki āftāb kyā hai
dekho to tah-e-naqāb kyā hai

vasl meñ bekār hai muñh par naqāb
sharam kā āñkhoñ pe parda chāhiye

chāñd bādal kī oT se nikle
ġham ye saare naqāb ho jaa.eñ

ai chashm-e-tamannā tirī ummīd bar aa.e
uThtā hai naqāb-e-ruḳh-e-jānāna mubārak

rafta rafta hī naqāb uTThegī rū-e-husn se
vo to vo hai ek dam koī bashar khultā nahīñ

jise merī aarzū ho jo ḳharāb-e-kū-ba-kū ho
mujhe dekhne se pahle tujhe be-naqāb dekhe

kahīñ bhī husn kā chehrā tah-e-naqāb nahīñ
ye apnā dīda-e-dil hai ki be-hijāb nahīñ

naqāb ulaT ke jo muñh āshiqoñ ko dikhlāte
tumhīñ kaho ki tumhārā nazāra kyā kartā

dhuup niklī din ko chehre se haTā lī jab naqāb
chāñdnī phailī jahāñ kapḌe utāre raat ko

hashr bhī to ho chukā ruḳh se nahīñ miTtī naqāb
had bhī āḳhir kuchh hai kab tak koī dīvāna rahe

ruḳh-e-munavvar pe dar-haqīqat misāl aisī naqāb kī hai
mah-e-do-hafta ke rū-e-raushan pe jaise chādar sahāb kī hai

naqāb rū-e-hasīñ uThā kar na is tarah ham ko bhuul jaao
murādeñ dil kī bhī puurī kar do agar nazar kāmyāb kī hai

jī chāhtā hai aag lagā duuñ naqāb meñ
jalvoñ se intiqām-e-nazar chāhtā huuñ maiñ

naqāb ruḳh se jab uThī bikhar ga.iiñ tajalliyāñ
latīf bijliyāñ girī haiñ jab vo muskurā.e haiñ

kahāñ ke dair-o-haram justajū-e-jalva-gar
yahī naqāb hai āñkhoñ se ye naqāb uThā

ye vasl kī raat hai ḳhudārā naqāb chehre se mat haTāo
tumhāre chehre kā ye ujālā sahar se pahle sahar na kar de