Tags-Naqab

uTThā naqāb chehra-e-zebā-e-yār se
dīvār darmiyāñ jo thī ham us ko Dhā chuke

hastī ko misl-e-naqsh-e-kaf-e-pā miTā chuke
āshiq naqāb-e-shāhid-e-maqsūd uThā chuke

huā yaqīñ ki zamīñ par hai aaj chāñd-gahan
vo maah chehre pe jab Daal kar naqāb aayā

nazar paḌī na mirī ro.ab-e-husn se ruḳh par
agarche sāmne mere vo be-naqāb aayā

aks-e-naqāb zīnat-e-ruḳhsār ho gayā
zevar jo siim kā thā talā-kār ho gayā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

vo naqāb aap se uTh jaa.e to kuchh duur nahīñ
varna merī nigah-e-shauq bhī majbūr nahīñ

ajiib naaz se ulTī naqāb-e-ruḳh is ne
kī mujh ko rūh-e-munavvar dikhā ke luuT liyā

naqāb udhar vo uThā.eñ idhar maiñ aah karūñ
samand-e-husn pe paḌ jaa.e tāziyāna-e-ishq

kabhī hai chāñd kā haala naqāb-e-lāla kabhī
anīle rañg dikhātī hai zulf-e-ġhāliya-gūñ

ḳhud-parastī anā hī kaafī hai
ruḳh zarā be-naqāb ho jaa.e

yā duur mirā hijāb kar de
yā apne ko be-naqāb kar de

ye ḳhvāb kyā hai ye zisht kyā hai jahāñ kī aslī sirisht kyā hai
baḌā mazā ho tamām chehre agar koī be-naqāb kar de

vaqt aajil hai safar tuul hai dam āñkhoñ meñ
ruḳh-e-jānāñ se naqāb ab to uThā dī jaa.e

jo samajh meñ aa.e vo baat kyā ye muāmalāt haiñ ishq ke
ki naqāb ruḳh pe rahe magar hai yaqīn ye vahī yaar hai

use na dekh sakeñge ai kaash inheñ dekheñ
vo kaun haiñ jo ise be-naqāb dekhte haiñ

naqāb ulTā hai sham.oñ ne sitāro tum to so jaao
kareñge raqs parvāne sitāro tum to so jaao

ubhrā huā naqāb meñ hai un ke ek taar
martā huuñ maiñ ki ye na kisī kī nigāh ho

vo mere sāmne ḳhanjar-ba-kaf khaḌā thā 'zeb'
maiñ dekhtā rahā us ko ki be-naqāb thā vo