Tags-Nasha

vallāh be-nashsha na rahī merī koī shaam
ukhḌā huā nasha hai mujhe maar dījiye

but-ḳhāne meñ din kaaTā maiḳhāne meñ shab guzrī
nasha hai na mastī hai kahiye bhī to kyā kahiye

sab ne cigarette kī tarah muñh se lagā lī duniyā
hai nasha itnā ki anjām nahīñ jānte haiñ

kyuuñ kar ye kahūñ husn kā nashsha nahīñ hotā
hotā to bahut hai magar itnā nahīñ hotā

nasha hai niiñd kā āñkhoñ meñ TūTtā hai badan
ki jaise maiñ bhī lagātār ratjagoñ meñ huuñ

huuñ zinda is liye furqat meñ ab tak
ki nashsha vasl kā bhūlā huā huuñ

agarche nashsha huuñ sab meñ ḳhum-e-jahāñ meñ lek
ba-rañg-e-mai araq-e-infi.āl apnā huuñ

mai ko mire surūr se hāsil surūr thā
maiñ thā nashe meñ chuur nasha mujh meñ chuur thā

asar hai sab pe mai-e-ishq kā judāgāna
kisī ko nashsha nahīñ hai koī hai dīvāna

ye be-yaqīnī ajab nasha hai ye be-nishānī ajab sakūñ hai
maiñ in añdheroñ ko raushnī se bachā rahā huuñ muaaf karnā

na.ī na.ī guftugū kā nashsha
baḌī purānī sharāb sā kuchh

chashm-e-maḳhmūr meñ saaqī kī ye kaifiyyat hai
nashsha mastoñ ke do-bālā hoñ jo hoñ chār-āñkheñ

ba-ḳhudā haiñ terī hindū but mai-ḳhvār āñkheñ
nashshe kī Dorī nahīñ pahneñ haiñ zunnār āñkheñ

sāhab vo bū ga.ī na vo nashsha havā huā
apne ta.iiñ maiñ jām-o-subū dho ke ḳhush huā

andāz-e-nazar us kā pāgal na kahīñ kar de
jab us kī taraf dekhūñ āñkhoñ meñ nasha aa.e

nashsha ke asbāb-e-taz.īñ meñ bhī nashsha hai zarūr
merī āñkheñ chaḌh ga.iiñ mai-ḳhāne kī chhat dekh kar

ye balā dhuāñ nasha hai mujhe is ghaḌī to saaqī
ki nazar paḌe hai saarā dar-o-sahn-o-bām ulTā

ye shaam aur us par tirī yādoñ kī halāvat
ik jaam meñ do shai kā nasha DhūñDh rahā huuñ

aañkh meñ Thahrā huā sapnā bikhar bhī jā.egā
rāt-bhar meñ niiñd kā nashsha utar bhī jā.egā

maiñ jitnī aur piitā jā rahā huuñ
nasha utnā utartā jā rahā hai