Tags-Nasha

tamām raat vo pahlū ko garm kartā rahā
kisī kī yaad kā nashsha sharāb jaisā thā

ishq nashsha hai na jaadū jo utar bhī jaa.e
ye to ik sail-e-balā hai so guzar bhī jaa.e

har nasha thā lahū kī garmī se
ab vo mastī kahāñ sharāboñ meñ

kyuuñ vo maġhrūr sar-e-bazm khaḌā thā 'gauhar'
us kī fitrat thī ki daulat kā nasha thā kyā thā

āñkhoñ meñ hai nashsha sā chhāyā ruḳhsār hue surḳhī maa.il
hoñToñ pe larazte haiñ armāñ pur-kaif harārat bātoñ meñ

taaza mohabbatoñ kā nasha jism-o-jāñ meñ hai
phir mausam-e-bahār mire gulsitāñ meñ hai

ajab chiiz hai lams kī tāzgī
nasha hī nasha do jahānoñ meñ thā

ik nasha sā mujhe huā koī
aañkh un se laḌā rahā koī

maiñ kisī aur ko sochūñ to mujhe hosh aa.e
maiñ kisī aur ko dekhūñ to ye nashsha TuuTe

nashsha haiñ ik bahr-e-ḳhūbī ke hamārī qabr par
chādar-e-āb-e-ravāñ kā shāmiyāna chāhiye

ye jo nasha hai raqs kā ik mirī zaat tak nahīñ
kūza-ba-kūza gil-ba-gil saath ḳhudā hai raqs meñ

nashsha thā kaisā ajab ḳhvāb kahānī meñ jab
aañkh thī raushan mirī naqsh the uryāñ tire

ḳhum ba ḳhum chhalke tirī sahbā nasha qaa.im rahe
lazzat-e-zahrāb ġham se kab huā thā āshnā

ahbāb kī bāñhoñ kā nasha aur hai lekin
tū ne kabhī dushman se lipaT kar nahīñ dekhā

jism kī aag kahāñ bujhtī hai
log kis vaqt mohabbat kā nasha sūñghte haiñ

kis qadar nāzuk hai ehsāsāt kā aalam ki ishq
ek hī nashsha hai lekin zahr bhī iksīr bhī

yaad kiiñ nashsha meñ Duubī huī āñkheñ kis kī
ġhash tujhe ai dil-e-bīmār chale aate haiñ

tirī mohabbat se pahle Darpok shahrī thā maiñ
tirā nasha to mujhe sipāhī banā rahā hai

ek nashsha hai ḳhud-numā.ī bhī
jo ye utre to phir tujhe dekhūñ

niiñd aatī hai is tarah shab ko
jaise piine meñ nashsha chaḌhtā hai