Tags-Nasha

daur thā ik guzar chukā nasha thā ik utar chukā
ab vo maqām hai jahāñ shikva-e-be-ruḳhī nahīñ

rah-e-junūñ meñ ġham-e-zindagī ko maar diyā
ye nashsha talḳh thā ham ne magar utaar diyā

tire ḳhayāl kī sar-mastiyāñ dimāġh meñ haiñ
ye vo nasha hai ki minnat-kash-e-subū bhī nahīñ

milī jo tere haath se to ho gayā nasha do-chand
raqīb-e-rū-siyāh ko dikhā dikhā ke pī gayā

'shād' na vo dīdār-parastī aur na vo be-nashsha kī mastī
tujh ko kahāñ se DhūñDh ke laa.eñ uf rī javānī haa.e zamāne

dilbar ke darshnā se daraktī huī nazar
akhiyoñ saḌī salkhiyoñ ko nashsha laḌā huā

na ḳhushī meñ ab vo surūr hai na to dard meñ vo nasha rahā
lo 'sahāb' bāda-e-ishq ke vo sabhī ḳhumār chale ga.e

imārat kā koī nashsha nahīñ thā
anā ke ghar se jab niklā nahīñ thā

maiñ jitnī aur piitā jā rahā huuñ
nasha utnā utartā jā rahā hai

bhare makāñ kā bhī apnā nasha hai kyā jaane
sharāb-ḳhāne meñ rāteñ guzārne vaalā

mirī vafāoñ kā nashsha utārne vaalā
kahāñ gayā mujhe hañs hañs ke hārne vaalā

qatra qatra jo nasha ishq kā utrā mujh meñ
rafta rafta tirī sāñsoñ meñ utartā dekhūñ

chuum liiñ nashshe meñ aaj un kī nashīlī āñkheñ
ain be-hoshī-e-lazzat meñ bhī hoshiyār rahā

sharāb ham ne yaksāñ hī pī thī magar
tujhe is qadar kyuuñ nasha ho gayā

ghoḌe pe maiñ savār huuñ sunte ho paidalo
mujh par savār nashsha hai maiñ us ke huuñ jilau

vo vaqt-e-shabāb vo zamāna na rahā
vo nashsha mastī vo tarāna na rahā

vo mast haiñ arsh par Tike haath
nashe meñ gire jo laḌkhaḌā kar

nasha hai un kī sadā kā ki dhaḌkaneñ merī
rahā gumān vo lekin kabhī mire na hue