Tags-Nazara

jahāñ dekhūñ vahāñ aao nazar tum
nazar ko vo nazāra chāhiye thā

samā.e jā rahe haiñ ab vo jalve diida o dil meñ
ye nazzāra hai yā zauq-e-nazar barbād hotā hai

hasīñ the duur hī se sāhil-o-dariyā ke nazzāre
magar jab Duub kar dekhā to sāhil thā na dariyā thā

kal tirī ḳhvāhish kab itnī banjārī thī
tū sar-tā-pā aañkh thā maiñ nazzāra thī

raat apne dīda-e-giryāñ kā nazzāra kiyā
kis se pūchheñ ḳhvāb meñ kaisā hai dariyā dekhnā

nazar ke saath nazzāra bhī gum hai
dil-e-muztar ye kis kā sāmnā hai

ye jo phailā hai falak tak shab-e-hijrāñ kā ġhubār
mirī vahshat kā nazāra bhī to ho saktā hai

yahī raheñge ye dar ye galiyāñ yahī raheñgī
tumhī chaloge koī nazāra nahīñ chalegā

misāl-e-ḳhurshīd jalva-gar hai jigar kā har ek dāġh-e-tābāñ
nazāra kar merī shām-e-ġham kā jo sub.h-e-raushan se kam nahīñ hai

ne muzhda-e-visāl na nazzāra-e-jamāl
muddat huī ki āshtī-e-chashm-o-gosh hai

begāna-sifat jāda-e-manzil se guzar jā
har chiiz sazā-vār-e-nazāra nahīñ hotī

agar nazāra hai manzūr ḳhastā-hāloñ kā
to aao khol deñ juuḌā tumhāre bāloñ kā

ai shauq-e-nazāra kyā kahiye nazroñ meñ koī sūrat hī nahīñ
ai zauq-e-tasavvur kyā kiije ham sūrat-e-jānāñ bhuul ga.e

pas-e-nazzāra koī ḳhvāb-e-gurezāñ hī na ho
dekhne meñ to tamāshā nazar aatā hai mujhe

raḳhnoñ se dīvār-e-chaman ke muñh ko le hai chhupā yaanī
in surāḳhoñ ke Tuk rahne ko sau kā nazāra jaane hai

majāl-e-dīd nahīñ hasrat-e-nazāra sahī
ye silsila hī bahut mo'atabar hai kyā kahiye

duniyā kā har nazāra nigāhoñ se chhīn le
kuchh dekhnā nahīñ hai tujhe dekh kar mujhe

tum ko sharm aatī hai ham qābil-e-nazzāra nahīñ
na rahā husn tumhārā na hamārī āñkheñ

kyā kareñ bazm-e-hasīnāñ meñ 'ta.ashushuq' jā kar
na rahīñ qābil-e-nazzāra hamārī āñkheñ