Tags-Nazara

go dekh chukā huuñ pahle bhī nazzāra dariyā-noshī kā
ek aur salā-e-ām ki saaqī raat guzarne vaalī hai

zehn meñ mahfūz haiñ jalve abhī us shoḳh ke
dil pareshāñ jab huā un kā nazāra kar liyā

koī dilkash nazāra ho koī dilchasp manzar ho
tabī.at ḳhud bahal jaatī hai bahlā.ī nahīñ jaatī

kahāñ tak shauq-e-nazzāra hai be-ḳhud ho ke ai 'sābir'
paḌā huuñ maiñ kisī kī rahguzar meñ naqsh-e-pā ho kar

sūrat-e-zāhirī ik parda-e-tārīk thī 'yās'
husn-e-ma.anī kā kan-āñkhiyoñ se nazāra hotā

dar-parda sahī sehr-e-nazāra ke asar se
sau tarah se tum dīda-e-ġhāfil meñ paḌe ho

kahīñ surāġh nahīñ hai kisī bhī qātil kā
lahūluhān magar shahr kā nazāra hai

ruḳh-e-raushan se nikaltī thiiñ shuā.eñ 'ovais'
us kī zulfoñ meñ nazāra thā ghaTāoñ jaisā

zavāl meñ bhī rahā dil-nashīñ nazāra mirā
mire hī saath girā TuuT ke sitāra mirā

vo aa rahe haiñ sambhal sambhal kar nazāra be-ḳhud fazā javāñ hai
jhukī jhukī haiñ nashīlī āñkheñ rukā rukā daur-e-āsmāñ hai

nākāmi-e-nigāh hai barq-e-nazārā-soz
tū vo nahīñ ki tujh ko tamāshā kare koī

rashk-e-mahtāb hai ik dāġh-e-tamannā kab se
dil kā nazzāra karo aa ke sar-e-shām kabhī

saaqī kī chashm-e-mast kā nazzāra kījiye
sahbā ko dekhiye na piyāloñ ko dekhiye

nahīñ az-rū-e-qānūn-e-mohabbat jurm-e-nazzāra
to phir kyuuñ haiñ janāb-e-dil agar dekho magar dekho

tāb-e-nazzāra hai vahī lekin
un ke jalvoñ meñ dilkashī kam hai

der se palkeñ nahīñ jhapkīñ mirī
pesh-e-jāñ ab ke nazāra aur hai

jo samjhā thā ḳhud ko nāzir
vo bhī ek nazāra niklā

mā.il-e-sair-e-charāġhāñ ḳhalq har jā dam-ba-dam
hāsil-e-nazzārā husn-e-sham.a-rū yaañ pai-ba-pai

shaam hote hī sañvartā hai mirī āñkhoñ meñ
ye nazāra hī mujhe aag banā detā hai

yahīñ bahisht bhī hai huur o jibra.īl bhī hai
tirī nigah meñ abhī shoḳhi-e-nazāra nahīñ