Tags-Nazara

maza detā nahīñ 'hāfiz' ruḳh-o-gesū kā nazzāra
misāl-e-ā.īna jab tak na ho āñkhoñ meñ hairānī

nazzāre ne bhī kaam kiyā vaañ naqāb kā
mastī se har nigah tire ruḳh par bikhar ga.ī

karūñ na kyuuñ husn kā nazāra sunūñ na kyuuñ ishq kā fasāna
isī kā to mashġhala thā barsoñ isī kā to valvala rahā hai

tāb-e-nazzāra ilāhī tauba
jalva hairān huā jaatā hai

āmāda rakheñ chashm-o-dil sāmān-e-hairānī kareñ
kyā jāniye kis vaqt vo nazāra farmānī kareñ

ġhamza-hā-e-pas-e-nazzāra 'naved'
ham ko rāh-e-safar dikhāte haiñ

ḳhvāhish hai ki ḳhud ko bhī kabhī duur se dekhūñ
manzar kā nazāra karūñ manzar se nikal kar

'nihāl' āñkheñ uThā bahr-nazāra
koī sū-e-gulistāñ aa rahā hai

sidq o safā sikhātā hai nazzāra-bāz ko
ā.īna-e-jamāl tirā sar se paañv tak

mujh ko nazzāra hai is parda-nashīñ kā manzūr
kaash ban jaa.eñ mirī rauzan-e-dīvār āñkheñ

dam-e-nazzāra us ne chupke chupke khol diiñ zulfeñ
mirā ye pūchhnā hī thā ki nāz-e-bahr-o-bar kyā hai

nazar ke vāste apnā nazāra kaafī hai
ḳhud apnā aks huuñ ḳhud apnā ā.īna huuñ maiñ

bas ek aks-e-nazāra hai inkishāf-e-vajūd
kulāh-e-shīsha-garāñ meñ ye bāñkpan kyuuñ hai

garmī-e-shauq-e-nazāra kā asar to dekho
gul khile jaate haiñ vo sāya-e-tar to dekho

tāb-e-nazzāra nahīñ go mujhe ḳhud bhī lekin
rashk kahtā hai ki aisā hī jamāl achchhā hai

nigah udaas hai de is ko koī nazzāra
zabāñ jo guñg hai yārab use kahānī de

ḳhud apnī diid se mahrūm hai nazar merī
azal se sūrat-e-nazzāra darmiyāñ huuñ maiñ

jalva-o-parde kā ye rañg dam-e-nazzāra
jis tarah adh-khule ghuñghaT meñ dulhan kyā kahnā

bas dhund nigal chukī hai ye raat
nazzāra tamām ho chukā hai