Tags-Nazara

vādī-e-gañg-o-jaman jannat-e-nazāra hai
sar-zamīñ apnī zar-o-sīm kā gahvāra hai

jurm-e-nazzāra kī paatā hai sazā dil ab tak
ahl-e-dil dekh liyā ahl-e-nazar dekh liyā

hasrat-e-dīd ne ā.īna banāyā dil ko
ain nazzāra hai nazzāre kā armāñ honā

nigāheñ qais kī yuuñ hī nahīñ haiñ mahv-e-nazzāra
ziyā lailā kī hai jo parda-e-mahmil se aatī hai

putliyāñ garmī-e-nazzāra se jal jaatī haiñ
aañkh kī ḳhair miyāñ raunaq-e-bāzār pe ḳhaak

maiñ ne tūfān se pahle kā ishāra dekhā
un kī añgḌā.ī kā jab shoḳh nazāra dekhā

shab nazāra-parvar thā ḳhvāb meñ ḳhayāl us kā
sub.h mauja-e-gul ko naqsh-e-boriyā paayā

tāb-e-nazzāra aañkh ko bhī nahīñ
dil bhī kab apne iḳhtiyār meñ hai

band kar letā huuñ āñkheñ 'tābish'
bāb-e-nazzāra magar khultā hai

dil-e-ā.īna-sāmāñ paara paara kar ke dekhā jaa.e
sitāroñ ko kabhī mahv-e-nazāra kar ke dekhā jaa.e

baiTho chaman meñ nargis o sad-barg kī taraf
nazzāra kar ke aish-o-masarrat kī daad do

tāb-e-nazzāra in āñkhoñ ko kahāñ
dekhne vāloñ se pardā chāhiye

zauq-e-nazar ko izn-e-nazāra na mil sakā
tanhā kabhī vo anjuman-ārā na mil sakā

ḳhvāhish hai ki ḳhud ko bhī kabhī duur se dekhūñ
manzar kā nazāra karūñ manzar se nikal kar

mujrim huā thā aañkh jhapakne kā maiñ 'adīm'
jo zehn meñ basā thā nazāra guzar gayā

yuuñ zindagī ke saath rahī umr bhar kī qaid
lāzim ho jaise bahr-nazāra nazar kī qaid

kisī se 'kaif' maiñ rāz-e-haqīqat kis tarah pūchhūñ
har ik sūrat har ik nazzāra hairāñ hai jahāñ maiñ huuñ

har ik nazzāra sau pardoñ meñ pinhāñ hai jahāñ maiñ huuñ
ḳhudā jaane kahāñ kal bazm-e-imkāñ hai jahāñ maiñ huuñ

us ko thā dīdār hāsil mujh ko nazzāra nasīb
mere us ke darmiyāñ ik jalva-e-jānāna thā

ik ḳhauf sā bas ghūmtā rahtā hai saroñ meñ
duniyā kā mire ghar se nazāra kare koī