Tags-Nazara

tūr-e-dil kī ḳhair ho ab tāb-e-nazzāra kahāñ
husn kā jalva tumhāre barq gir jaane kā naam

nazar baaqī hai lekin tāb-e-nazzāra nahīñ ab
suḳhan baaqī hai lekin mudda.ā gum ho gayā hai

ġhair ke bar meñ un ko dekhā ḳhaak meñ jaa.e aisā nazāra
haath meñ kam-baḳht aa nahīñ saktā toḌte varna tār-e-nazar ham

ajab riqqat-fazā hai āḳhirī milne kā nazzāra
gale lag lag ke bismil ḳhanjar-e-qātil se miltā hai

mujh ko mahrūmī-e-nazzāra qubūl
aap jalve na apne aam kareñ

ḳhayāl-e-yārān-e-kū-ba-kū se nazar hai ik mātam-e-nazāra
dam-e-harīfān-e-be-subū se nafas hai be-nañg-o-nām kahnā

karne nazāra baaġh kā niklā hai gul-badan
barjā hai har chaman suuñ gar aave bahār chal

maiñ karūñ kis kā nazāra dekh kar terā jamāl
maiñ sunūñ kis kā fasāna tere afsāne ke ba.ad

tum kahīñ jā ke chhupo da.avat-e-nazzāra to do
phir ye maqdūr-e-nazar hai ki jahāñ tak pahuñche

jo terī diid ne baḳhshe vahī haiñ zaḳhm bahut
ab apne dil meñ koī hasrat-e-nazāra nahīñ

ye tahayyur hai ki nazzāra ki afsūn-e-jamāl
sāmne paikar-e-āhū ram-e-āhū dil par

ab to muddat se rah-o-rasm-e-nazāra band hai
ab to un kā tuur par bhī sāmnā hotā nahīñ

agar ho dekhnā maqsūd barbādī kā nazzāra
jilā kar dekhiye ik baar apnā āshiyāñ pahle

dhuāñ hai jalte hue ghar sulagte nazzāre
maiñ kyā batā.ūñ ki kyā kyā dikhā.ī detā hai

hai mushtarak nazāra-o-nazzārgī kā vasf
ik aañkh meñ to duujā banāyā charāġh meñ

naama de kar nazāra hai manzūr
ham taqāzā-e-nāma-bar samjhe

maiñ zabāñ se to kah nahīñ saktā
jo nazāra nazar ne dekhā thā

ḳhayāloñ meñ kahīñ naġhma kahīñ ġhuncha kahīñ sahbā
dam-e-nazzāra ye nāzuk badan talvār hote haiñ

qarya-e-jāñ bhī hai aur dāvat-e-dīdār bhī hai
aañkh baaqī nahīñ lekin hai nazāra baaqī

ai hūr-e-jināñ jān-e-chaman rūh-e-nazāra
ai paikar-e-anvār-o-dil-āvez dil-ārā