Tags-Nazara

jaatī hai dil kī hasrat-e-nazzārgī kahāñ
nazzāra ho gayā hai nigāhoñ pe baar tak

nazzāra ajab us ke garebāñ kī taraf thā
har aañkh kā ruḳh sīna-e-uryāñ kī taraf thā

kaun pā.egā tāb-e-nazzāra
un kī abrū kamān hotī hai

tulūa kā dil-faroz manzar
ġhurūb kā dil-shikan nazāra

koī to hai pas-e-dīvār-e-gulsitāñ jis ke
nazāra jo haiñ shajar eḌiyāñ uThā.e hue

kahtī haiñ na lā pā.eñgī ye tāb-e-nazāra
āñkhoñ kā bahāna mire matlab kā nahīñ hai

shaam hue ḳhush-bāsh yahāñ ke mere paas aa jaate haiñ
mere bujhne kā nazzāra karne aa jaate hoñge

shabāb-e-zindagī jalvoñ kā ik ma.asūm nazzāra
hameñ ai dil vo afsāne abhī tak yaad aate haiñ

nazzāra to hai be-parda magar har dekhne vaalā kyā dekhe
jo zarf-e-nazar meñ aa na sakeñ aise bhī nazāre hote haiñ

jo tīrgī meñ tujhe kuchh dikhā.ī detā nahīñ
samajh meñ aa.e to is ko bhī ik nazāra samajh

chamak uTThā ho abhī rū-e-bayābāñ ik dam
aur ye nazzāra kisī aur ne dekhā hī na ho

bas ek chīḳh girī thī pahāḌ se yak-laḳht
ajab nazāra thā phir dhund ke bikharne kā

nazar aa jaatā hai ai gul jise ruḳhsār tirā
phūloñ se dāman-e-nazzāra vo bhar letā hai

qaid-e-nazzāra se jalvaoñ ko nikalne na diyā
dostoñ kī ye vasī.a-un-nazarī to dekho

ban ga.e hairat-e-nazzāra kī sūrat 'bedam'
raas aayā na hameñ diid kā armāñ karnā

uḌāneñ bharte parindoñ ke par katar Dāleñ
nazar ke sāmne aisā kabhī nazāra na thā

husn-e-nazzāra sahī jalva-dar-āġhosh sahī
ishq phir ishq hai be-ḳhud sahī mad.hosh sahī

shauq-e-nazāra ne āñkheñ hī nahīñ khulne diiñ
ye kisī ko nahīñ ma.alūm ki dekhā kyā thā

muzhda ai hasrat-e-nazzāra ki vaañ
gird chilman ke ridā-bandī hai