Tags-Neend

use be-numū kisī ḳhvāb ne kahīñ gahrī niiñd sulā diyā
use bhā ga.ī haiñ kahāvateñ use bhī qafas meñ sukūn hai

niiñd kī parī āḳhir ho ga.ī ḳhafā ham se
aur koī āñkhoñ meñ jab chhupā huā paayā

aap jis se kalām karte haiñ
niiñd us kī harām karte haiñ

phir sāmne hai pahāḌ sī raat
phir shaam se niiñd uchaT ga.ī hai

vo niiñd milī hai ki jo puurī nahīñ hotī
vo ḳhvāb milā hai ki jo ma.azūr huā hai

dekh idhar o niiñd ke maate kis kī achānak yaad aa.ī
biich se TuuTī hai añgḌā.ī haath uThte hī jhuul paḌā

qaid hone se rahīñ niiñd kī chanchal pariyāñ
chāhe jitnā bhī ġhilāfoñ ko mo.attar kar de

terī furqat meñ jo aa.e bhuul kar āñkhoñ meñ niiñd
mardumān-e-chashm ne phir muñh na dekhā ḳhvāb kā

niiñd kī sūrat nahīñ dekhā ba-juz dāġh-e-jigar
parda merī aañkh meñ shāyad ki hai kam-ḳhvāb kā

kyuuñ leñge 'jalāl' aa ke mire dil meñ vo chuTkī
jhapkegī palak kaahe ko niiñd aa.egī kis ko

niiñd āñkhoñ meñ jo aatī to jagāne lagte
ḳhvāb bachchoñ kī tarah shor machāne lagte

ham ko to jāgnā hai tire intizār meñ
aa.ī ho jis ko niiñd vo so.e mazār meñ

sub.h nazdīk hai karvaT bhī badal soch samajh kar 'ḳhālid'
zehn par āḳhir-e-shab niind kī talvār na chal jaa.e kahīñ

jab dil meñ terī yaad na āñkhoñ meñ niiñd thī
aisī bhī ek raat mujhe kāTnī paḌī

jhāñk sakte ho agar niiñd kī vaadī se pare
dekh sakte ho mujhe ḳhvāb-o-ḳhayālāt samet

ek do pal ke liye ham ko atā ho jaa.e
niiñd ai qibla-e-hājāt ki ham so na sake

maiñ gayā us taraf
jis taraf niiñd thī

palkoñ ke Daale niiñd ne parde
kis darīche se ho ke ḳhvāb aa.e

mirī shab-e-ġham kā pūchhnā kyā ajiib pesh-e-nazar hai manzar
ye zindagī jhilmilā rahī hai ki niiñd tāroñ ko aa rahī hai

pahre pe sab hī chor haiñ ye tab patā chalā
āñkhoñ se jab ye niiñd ke pahre utar ga.e