Tags-Neend

koī chehra koī mahtāb dikhā.ī detā
niiñd aatī to koī ḳhvāb dikhā.ī detā

us din se mujh ko niiñd na aa.ī tamām umr
ik shab milī thī aañkh tire pāsbān se

aañkh lag jaatī hai phir bhī jāgtā rahtā huuñ maiñ
niiñd ke aalam meñ kyā kyā sochtā rahtā huuñ maiñ

ye Dar rahā ki sote na paa.eñ kahīñ mujhe
vaade kī raat niiñd na aa.ī tamām shab

thā ġhair kā jo rañj-e-judā.ī tamām shab
niiñd un ko mere saath na aa.ī tamām shab

ahl-e-duniyā bāvle haiñ bāvloñ kī tū na sun
niiñd uḌātā ho jo afsāna us afsāna se bhaag

apnī rūdād kā raavī hai ye sotā huā ghar
ik palak niiñd nahīñ chaar bajā chāhte haiñ

garche gul kī sej ho tis par bhī uḌ jaatī hai niind
sar rakhūñ qadmoñ pe jab tere mujhe aatī hai niind

ham nahīñ bole agar tū kaun phir
niiñd toḌegā ki hoñ bedāriyāñ

ma.alūm thiiñ mujhe tirī majbūriyāñ magar
tere baġhair niiñd na aa.ī tamām raat

gaañv meñ dekho zarā kis niiñd meñ sab chal rahe haiñ
TuuT kar saare makāñ khañDar ke paikar Dhal rahe haiñ

aañkh meñ chubh ga.e ka.ī manzar
ab kahāñ niiñd aane vaalī hai

niiñd bhare halkore leñ rāteñ kis ke hāthoñ
kaun charāġh-e-sub.h ujāle ye ham kyā jāneñ

maut kī niiñd sulā de 'ḳhālid' kin hāthoñ kī thapak
nezoñ par sar kaun uchhāle ye ham kyā jāneñ

niind ban kar mirī āñkhoñ se mire ḳhuuñ meñ utar
rat-jagā ḳhatm ho aur raat mukammal ho jaa.e

niiñd ragoñ meñ dauḌ rahī hai por por bedārī hai
jism bahut hassās hai lekin dil jazbāt se aarī hai

yuuñ niiñd se kyuuñ mujhe jagā kar charāġh-e-ummīd phir jalā kar
huī sahar to use bujhā kar havā ke jaisā guzar gayā vo

maiñ ik ḳhvāb huuñ terā dekhā huā huuñ
tū ik niiñd hai mujh meñ soī paḌī hai

chalo achchhā huā āḳhir tumhārī niiñd bhī TuuTī
chalo achchhā huā ab tum bhī ḳhvāboñ se nikal aa.e

qissa-go niiñd nahīñ aa.ī bahut din se hameñ
tire paas ek kahānī ke liye aa.e haiñ