Tags-Neend

niiñd hī jaise koī kunj-e-amāñ hai ab to
chain miltā hai bahut der se so kar mujh ko

ham bhī hañgāma-e-bāzār-e-jahāñ se guzre
jaise 'zīshān' koī niiñd meñ chalne lag jaa.e

is tarah shafaq ko niiñd aa.ī
ehsās ko ḳhvāb aa rahā hai

niiñd kyā kījiye ki ā.ankhoñ meñ
ik na.ī jañg ḳhair o shar kī hai

ik isī ḳhvāb ne kyā kyā na tamāshā dekhā
niiñd ke haath meñ jaadū kī chhaḌī raat ga.e

chuuñ sham-e-sozāñ chuuñ zarra hairāñ z mehr-e-āñ-mah bagashtam āḳhir
na niiñd naināñ na añg chaināñ na aap aave na bheje patiyāñ

jāgtā huuñ to sitāre mirī āñkhoñ meñ utar jaate haiñ
niiñd aatī hai to mahtāb sā chehra terā

raat vahī phir baat huī nā ham ko niiñd nahīñ aa.ī
apnī ruuh ke sannāTe se shor sā ik uThtā dekhā

kaise pahuñche niiñd āñkhoñ tak
baiThā hai dil rasta ghere

bhīgī palkeñ niiñd se ḳhālī
chain ke dushman rain-basere

niiñd uḌne lagī hai āñkhoñ se
dhuul jamne lagī hai bistar par

niiñd rātoñ kī mire yaar uḌātī hai ġhazal
sub.h tak ek ġhazal-go ko jagātī hai ġhazal

yaad ā.eñgī bahut niiñd se bojhal palkeñ
shaam ke saath ye dukh aur ghanerā hogā

giit hī sirf laboñ par ho to aa jaa.e bhī niiñd
vo koī aur kahānī bhī sunātā hai mujhe

niiñd se bojh haiñ patte ūñghte se peḌ haiñ
shahar soyā hai ḳhamoshī kā labāda oḌh kar

kū-e-jānāñ se jo uThtā huuñ to so jaate haiñ paañv
daf.atan āñkhoñ se paañv meñ utar aatī hai niiñd

hamārī niiñd meñ girdāb banñe lagte haiñ
udaas kamra ajab qahqahe lagātā hai

baat koī umiid kī mujh se nahīñ kahī ga.ī
so mire ḳhvāb bhī ga.e so merī niiñd bhī ga.ī

jis ne tumhārī niiñd pe pahre biThā diye
apnī taraf se tum use ġhāfil samajhte ho

koī maqām niiñd ke bāġhoñ meñ thā kahīñ
ThanDī havāoñ meñ vahāñ do-pal rukā thā maiñ