Tags-Phool

rūhoñ meñ jaltī aag ḳhayāloñ meñ khilte phuul
saarī sadāqateñ kisī kāfir nigāh kī

vasl kar degā ḳhizāñ ko fasl-e-gul
phuul bāloñ meñ lagā.eñ to sahī

ham har-nafas khilā.enge apne lahū se phuul
tum ehtimām-e-dār-o-rasan har ghaḌī karo

shaam ajiib shaam thī jis meñ koī ufaq na thā
phuul bhī kaise phuul the jin ko suḳhan kā haq na thā

ajab hai phuul kī fitrat use masal kar tum
mahakte hāthoñ kī ḳhushbū chhupā nahīñ sakte

yaad kartā rahā kisī ko koī
phuul dil meñ khilā hamesha se

dil ke sannāTe meñ ḳhushbū ke darīche khul ga.e
dastakoñ ke phuul darvāze pe mahke dekhnā

mire hāthoñ pe sūkhe phuul kī kuchh pattiyāñ rakh kar
bichhaḌte vaqt us ne mujh ko siine se lagāyā thā

phuul murjhāte haiñ alfāz nahīñ murjhāte
duur jaanā hai buzurgoñ kī duā le jaao

dukh meñ jab 'shabnam' use dekhā to andāza huā
phuul kī pattī bhī kam hotī nahīñ talvār se

chhoḌ kar phūloñ kī rut phuul se chehroñ ko 'sho.eb'
tujh ko vīrānoñ se kyā kaam tirī umr darāz

ye kis ne phuul Daale haiñ lahad par
judā har pañkhuḌī se pañkhuḌī hai

is shahr-e-be-vafā meñ jafāoñ ke ba.ad bhī
'arpit' vafā ke phuul khilātā rahā huuñ maiñ

ghaat kī palkeñ jhapak rahe haiñ khul khul kar anjān darīche
zaḳhmoñ ke ab phuul sameTo patthar khaao dīvāroñ se

ham bhārat kī phulvārī ke rañg birañge phuul
ik duuje ko kāñTā samjheñ ye hai apnī bhuul

tujh ko sochūñ to phuul khilte haiñ
dil kī nagrī meñ kū-ba-kū yaarā

havā se sar-kashī meñ phuul kā apnā ziyāñ dekhā
so jhuktā jā rahā hai ab ye sar āhista āhista

baaġh thā jis tarah sajā us meñ kisī kā haath thā
jaisā bhī koī phuul thā ek qatār meñ milā

phuul kuchh is tarah khilā dil bhī zarā sā kaT gayā
thoḌā sā rañg ḳhuun kā rañg-e-bahār meñ milā

vo laal geñd phuul ho jaise gulāb kā
jis tarah dast-e-nāz meñ sāġhar sharāb kā