Tags-Phool

tū kabhī phuul kabhī chāñdnī thā mere liye
ab tujhe pairhan-e-barq-o-sharar meñ pā.ūñ

kaḌī nigāh rakhegā vo sīm-tan mujh par
ki mehrbāñ hai kisī phuul kā badan mujh par

din the lekin inqalāb aane se pahle ke the din
phuul abhī mahkā na thā patthar abhī bolā na thā

ab to vo shāḳh bhī shāyad hī gulistāñ meñ mile
kaash is phuul ko us vaqt hī toḌā hotā

sub.h hone kī hai minnat to vo maano 'rif.at'
phuul khilne kī duā hai to duā yaad karo

inhī sub.hoñ meñ vo ik sub.h-e-navā yaad karo
phuul khilne kī duā hai to duā yaad karo

barsoñ ba.ad jab us ko dekhā phuul sā chehra badal chukā thā
peshānī par fikr kī aayat āñkheñ ab sanjīda thiiñ

phuul ko miTTī meñ miltā dekh kar miTTī hue
ham se koī phuul miTTī par nahīñ dekhā gayā

short circuit se uḌiiñ chiñgāriyāñ
sadr meñ ik phūl-vālā jal gayā

aatā hai yaad phuul ke dekhe siiñ gul-badan
āshiq kā chhīltī hai jigar bulbuloñ kī haañk

kahīñ mohabbat ke āsmāñ par visāl kā chāñd Dhal rahā hai
charāġh ke saath tāqche meñ gulāb kā phuul jal rahā hai

jis muTThī meñ phuul hai us ko band rakho
khil kar ye jugnū ban jā.egā ik din

bas tujhe dekhūñgā aate hue apnī jānib
phuul qadmoñ meñ bichhā.ūñgā chalā jā.ūñgā

usī ko zulf meñ Tāñke ye aarzū kyūñ-kar
vo phuul jo ki tirī dastaras se bāhar thā

ik mahaktī bahaktī huī raat hai laḌkhaḌātī nigāhoñ kī sauġhāt hai
pañkhuḌī kī zabāñ phuul kī dāstāñ us ke hoñToñ kī parchhā.iyāñ dosto

bojh ashkoñ kā uThā letī haiñ palkeñ merī
phuul ke vazn se kab shāḳh-e-shajar TūTtī hai

phuul jaisī hai kabhī ye ḳhaar kī mānind hai
zindagī sahrā kabhī gulzār kī mānind hai

muñh phuul se rañgīñ thā va saarī thī us harī
khatrānī ek dekhī maiñ panghaT pe jyuuñ parī

aaj bhī har phuul meñ bū-e-vafā āvāra hai
aaj bhī har zaḳhm meñ tere karam poshīda haiñ

phuul aa.e haiñ na.ī rut ke na.ī shāḳhoñ par
mauja-e-māh-e-dil-e-ārām kī baarī aa.ī