Tags-Phool

ik baar jo kho jaa.e vo vaqt nahīñ miltā
jo phuul bikhar jaa.e vo murjhā ke nahīñ khiltā

mausam-e-gul hai ye kaisā ki chaman hairāñ hai
har kalī phuul kā dil jaise ki merā ai dil

simaT ga.ī to shabnam phuul sitāra thī
biphar ke merī lahar lahar añgāra thī

ka.ī tarah ke tahā.if pasand haiñ us ko
magar jo kaam yahāñ phuul se nikaltā hai

har shāḳh-e-chaman hai afsurda har phuul kā chehra pazhmurda
āġhāz hī jab aisā hai to phir anjām-e-bahārāñ kyā hogā

maiñ ne jo phuul chune the tire qadmoñ ke liye
un kā dhundlā sā tasavvur bhī mire paas nahīñ

kahāñ mahakte the pahle mire dar-o-dīvār
ye kaam us kī mohabbat kā phuul kartā hai

dil-e-nāzuk mutahammil nahīñ ġham ho ki surūr
phuul maqtūl hai ḳhud apnī hī ra.anā.ī kā

ai 'bahr' bāġhbān kī minnat balā kare
do-chār phuul baaġh se hāsil hue to kyā

dāġhoñ meñ us ke dāġh-e-mohabbat kī bū kahāñ
laale ke phuul ham se muqābil hue to kyā

beleñ dīvāroñ se lipaTnā bhuul ga.iiñ
mausam apne phuul khilānā bhuul gayā

ḳhat likkhā hai lekin ḳhat ke kone par
vo hoñToñ se phuul banānā bhuul gayā

ye phuul sāda-o-be-rañg hī sahī lekin
tumhāre joḌe meñ kyā ḳhushnumā sā lagtā hai

pūchhtī hai sabā gulistāñ se
phuul kyuuñ tāzgī kā hāsil hai

ahl-e-mahfil ko sunātā huuñ mazāmīn-e-bahār
tab-e-rañgīñ ke zarīye phuul barsātā huuñ maiñ

us ko hañstā dekh ke phuul the hairat meñ
vo hañstī thī phūloñ kī hairānī par

'sūfī' chaman meñ koshish-e-paiham ke bāvajūd
jo phuul nauha-ḳhvāñ the yūñhī nauha-ḳhvāñ rahe

gulshan talak meñ zahr ta.assub kā ghul gayā
kal phuul bhī milā thā mujhe gun liye hue

chune the phuul muqaddar se ban ga.e kāñTe
bahār haa.e hamāre liye bahār nahīñ

jo itā.at-pazīrī huī zābta
phuul sahrā ke bhī darmiyāñ mil ga.e