Tags-Phool

kis kī ḳhātir ujaaḌ raste par
phuul le kar shajar khaḌā huā thā

un kī fitrat us ko kahiye yā ki fitrat kā usuul
Duub jaate haiñ sitāre aur bikhar jaate haiñ phuul

laa.e jo mast haiñ turbat pe gulābī āñkheñ
aur agar kuchh nahīñ do phuul to dhar jā.eñge

sehn-e-chaman meñ dil ke lahū kī har ek buuñd
patte ko phuul shāḳh ko talvār kar ga.ī

merā matlab hai
dīvār se lipTā huā ek phuul

bas ek phuul kī ḳhātir bahār māñgī thī
rutoñ se varna maiñ qaul-o-qarār kyā kartā

ai chakvāl se aane vaalo kuchh to hāl-ahvāl kaho
phuul se aariz chāñd se chehre tum ne bhī dekhe hoñge

phuul khilne kā ajab mausam thā
aa.ina dekh rahā thā maiñ bhī

tumhīñ se phuul chaman ke tumhīñ se phulvārī
sajā.e jaao diloñ ke gulāb kī kyārī

tujh se milne kī tamannā tirī qurbat kā ḳhayāl
reg-zāroñ meñ koī phuul khilā ho jaise

mahfil meñ phuul ḳhushiyoñ ke jo bāñTtā rahā
tanhā.ī meñ milā to bahut hī udaas thā

shāḳh hunar se toḌ ke sher kā phuul maiñ us ko de duuñ
us kī zulf ko hai ma.alūm gulāb ko taaza rakhnā

tamām phuul se chehroñ kī surḳhiyāñ uḌ jaa.eñ
agar chaman se ye ḳhush-rañg titliyāñ uḌ jaa.eñ

har phuul ke lab par naam mirā charchā hai chaman meñ aam mirā
shohrat kī ye daulat kyā kam hai gar paas nahīñ hai maal to kyā

zaḳhm khānā hī jab muqaddar ho
phir koī phuul ho ki patthar ho

tujhe ai dīda-e-tar fikr kyuuñ hai dil ke zaḳhmoñ kī
ki be-shabnam ke bhī ye phuul murjhā.e nahīñ jaate

kaisī havā ye aa.ī gulistāñ se garm garm
kyā phuul sho.ale ban ga.e sāvan kī dhuup se

saarā mausam badal chukā thā phuul bhī the aur aag bhī thī
raat ne jab ye svāñg rachāyā chāñd bhī ruup badalne lagā

ban ga.ī hai maut kitnī ḳhush-adā mere liye
sar jhukā kar phuul karte haiñ duā mere liye

ik dāman meñ phuul bhare haiñ ik dāman meñ aag hī aag
ye hai apnī apnī qismat ye haiñ apne apne bhaag